Aurten ere film dokumentalen Udako Zinemaldia antolatu da Hernanin. Emanaldiak bi jardunalditan banatu dira: uztailaren 26ean (asteazkena) bata eta 27an (osteguna) bestea.
Aurtengoan ere emanaldiak udaletxeko arkupeetan izango dira, 22:30etan hasita. Asteazkenean, lehen egunean, aipaturiko orduan, Colours of Resilence (2014) eskainiko da.
Siriako gerratik ihesi Jordanian dagoen Zaatariko errefuxiatuen kanpalekuan milaka eta milaka haurren inguruko lana da.
Elkartasunaren bidetik, erresilientziaren koloreak margotzen dituen dokumental honek Sirian batzuk bizi duten egoera gertutik ezagutzera hurbilduko du ikuslea.
Ostegunean eta ordu berean bigarren emanaldia egongo da. La Once dokumental txiletarra eskainiko da.
Duela 60 urte hilero tea hartzera elkartzen diren bost emakume adinduen solasaldiak azaltzen dira film honetan. Aktualitatearen joera batzuk ulertzen ez dituzten arren, iragan amankomuna gogoraraziz eta pairatzen dituzten gaitzak une batez ahaztuta, oraindik indarrean daudela erakusten ahalegintzen dira.
Txilen bildutako sariez gain, munduko beste zortzi herrialdetan saritu dute Maite Alberdik zuzendu duen film dokumental bikain hau.