Asteazkenean bildu zen Astigarragako plenoa, eta lantzeko zeuzkaten puntu guztiak onartu zituzten. Eta puntu bat gehiago txertatzea ere onartu zen, gai ordenari heldu aurretik, Zarkumendegiko zabalpenari buruzkoa; lehiaketaren behin behineko onarpena atzera bota, eta enpresekin hitz egin ondoren berriz onartzea. EAJ eta PSE-EEren aldeko botoekin eta EH Bildu bost abstentzioekin (zinegotzi bat ez zen plenoan izan) onartu zen puntua.
Boto banaketa berarekin onartu zen kreditu aldaketa bat egitea, 523.996,03 eurokoa. Andoni Gartzia EH Bilduko bozeramaileak azaldu zuen beraien abstentzioa: «plenoak onartu zuen kontuhartzailearen proposamena, kreditu hori ez txertatzekoa, proiektu batzuen zenbatekoak ezagutu arte. Eta abstenituko gara, nahiz eta jaso diren proiektuekin ados egon, beste proiektu garrantzitsu batzuk falta direlako». Eta modu berean, azaldu zuen ez daudela ados herrian hiru radar jartzearekin, gehiegizko abiaduraren arazoa konpontzeko beste aukera batzuk daudelako. Zorione Etxezarraga alkateak erantzun zion, Udaltzaingoaren txosten bat jaso dutela hori proposatuz, eta aintzat hartu dutela.
Boto banaketa izan zen, tokiko garapenerako batzorde kudeatzaileko ordezkoak izendatzerakoan ere: Nerea Zusberro eta Jon Arregi izango dira ordezkoak. Kontra bozkatu zuen EH Bilduk, «alderdi bozkatuena izanda, ordezkaririk ez daukagulako bertan».
Bost puntu, aho batez
Aldiz, aho batez onartu zituen bost puntu, asteazkeneko plenoak: 2016ko Kontu Orokorra; udal ordainsarien urteko %1eko igoera; Astigarragako parrokiarekin lankidetza hitzarmena eta usufruktu kontratua sinatzea; Gipuzkoako Foru Aldundiarekin hitzarmena, informazioa elkarri uzteko; Urumea kaleko 6 eta 10 zenbakietan, alokairu sozialeko sei etxebizitza zozketatzeko oinarriak; eta Santiomendiko natur eskola eta aterpeko kontratua luzatzea, Sasoi Sport enpresarekin.
EH Bilduk aurkeztutako mozioa onartu zuten azkenik, adieraziz neurrigabekoa dela Altsasuko gazteei eskatu zaien zigorra, eta Udalak erabateko desadostasuna eta bere kezka erakutsiz. Kontra bozkatu zuen PSE-EEk, «gertaerak oso larriak» izan zirelako, eta alde EAJk, «gertatu zena larria izan arren, desproportzionatuak direlako zigor eskaerak».
Galderen puntuan, Gartziak aipatu zuen, besteak beste, jakin dutela «monjen konbentua hustutzera dijoazela, eta Udala bertan izan dela, eraikina eskuratzeko interesa azalduz». Etxezarragak erantzun zion, alkate gisa deitu zutela monjek, agurra emateko, baina hortik aurrera, momentuz ez dagoela ezer: «nondik jakin duzue interes horren berri? Kamarak jarri dituzue?». Eta Gartziak erantzun: «oso oker ez gabiltza, hori galdetu duzuenerako».