Festa garaian areagotzen den kezka da indarkeria sexistarena, eta horren inguruan, adi egoteko deia luzatu die Udalak, herritar guztiei: «adi egon! Denok batera emakumeenganako eraso sexistak moztu ditzakegu», adierazi du, Moztu! kanpainaren bitartez.
Horretarako, hainbat jarraibide markatu ditu Udalak. Hasteko, nabarmendu du dena ez dela zilegi, «eta jaietan, ezetza beti da ezetz». Ondoren, pentsatu eta erabakitzeko eskatu die herritarrei, eta zerbait gaizki doala sentitzen badute, ekiteko: «zuk bakarrik dakizu zer duzun gustuko, zerk gogaitzen zaituen eta zerk erasotu; erabakia zeurea da!».
Erasorik ez onartzeko eskatu diete, «emakumea zein gizonezkoa bazara»; eta laguntza behar izanez gero, bi telefono gogorarazi dituzte: Larrialdiena 112; eta Udaltzaingoarena 943 33 52 30.
Baina erasoa jasotzen dutenei bakarrik ez, erasoren bat ikusten dutenei ere egin diete deia, ekiteko: «erantzun, arbuiatu eta lagundu. Eraso matxista bat ikusten baduzu, ez geratu albo batera, zure laguntza garrantzitsua da».