Luis Intxauspe Hernaniko alkateak, eta Añarbeko Uren Mankomunitateko presidenteak, Maije Zelaia Egigurenek, lankidetza hitzarmen bat sinatu dute, Karabel auzoko saneamendu-sistema birmoldatzeko eta urbanizatzeko.
Horri esker, 1987 urtean eraikitako zubi azpiko Karabel HUPE (hondakin-uren ponpatze-estazioa) kendu egingo da.
Urbanizatze-lan horiei esker, Karabel kalea oinezkoentzat izango da, eta baimendutako ibilgailuek izango dute soilik pasatzeko aukera. Karabel eta Landare arteko trafikoa, berriz, lezoiaren gaineko bide berritik joango da. Horrek guztiak, inguruko espazio publikoa hobetuko du, azaldu dutenez: «zuhaitz arteko oinezkoen pasealeku berri bat egongo da Karabelgo zubiaren eta erdigunera daraman igogailuaren artean; bidegorri berri bat egingo da; eta zolak, hiriko altzariak eta zerbitzuak berrituko dira. Guzti horri esker, auzo honetako zerbitzuak, itxura eta bizi-kalitatea hobetuko dira».
Hondakin-ur gehienak, Loiolako haraztegira bideratuko dira
Bestalde, saneamendu sare berri bati esker, auzoko eraikinetako hondakin-ur gehienak Urumeako kolektorera eta, hortaz, Loiolako araztegira, bideratuko dira grabitatez.
Gainontzeko hondakin-urak, berriz, Udalarena izango den ponpatze-estazio txiki eta efizienteago baten bidez izango dira kanporatuak. Azkenik, edateko uraren hornidura-sarea ere, haunditu egingo da, sare itxura emango zaio, eta horrela, hornidura bermatua egongo da.
Obrak dagoeneko lizitazio fasean daude, eta 678.000 euroko aurrekontua eta sei hilabeteko gauzatze-epea dute. Hernaniko Udalaren eta Añarbeko Uraken artean finantzatuko dira, %60an eta %40ean, hurrenez hurren.