Duela hilabete bat etorri ziren Hernanira, udara herrian pasatzen ari diren bost neska-mutil sahararrak. Horietako hiru, Selma Mohamed Lamin, Leila Abdi Embarek eta Mohamed Uadadi Mohamed-Moulud, aurreko urtean ere izan ziren Hernanin; eta beste bi ume berri iritsi dira aurten: Fatma Mohamed-Moulud, eta Hayat Salma Bad.
Lua eta Albak, Hayat hartu dute euren etxean: «esperientzia mundiala ari gara bizitzen. Bere alde txarrekin eta onekin, bizipena izugarria da. Gu Hayatekin gaude, eta egokitu egin behar gara denak. Mundu oso desberdinera etorri da, janariak oso desberdinak dira, ohiturak, jendea, paisaia, eraikin edo etxe motak... Bai berarentzat eta guretzat dena da berria, hizkuntza ere bai. Alde horretatik kosta egiten da, gainera 10 urteko neska txiki bat da, eta gurasoak ere faltan botatzen ditu».
Hala ere, beraien lehenengo esperientziaz gozatzen ari dira Alba eta Lua, Kronikari kontatu diotenez: «esperientzia polita eta aberasgarria bizi dugu, bai guk eta bai berak. Hiruak gauza asko ari gara ikasten eta jabetzen, gu bere kulturarekiko eta alderantziz, bera gure bizimoduaz eta kulturaz».
Biak aurten animatu dira aurreneko aldiz, ume bat hartzera: «denbora generamakien pentsatzen haur saharar bat ekarri behar genuela. Aurten suertatu da guk posible genuela ekartzea, eta animatu egin ginen».
Hala ere, Albak badu eskarmentua gai hauetan: «duela urte batzutatik, nire lagun batzuek ekartzen zuten Saharako haur bat udararo. Harremana sendotzen joan zen, eta honela, duela hiru urte bertako kanpamenduetara joan nintzen, eta geroztik buruan neukan ahal genuenean ume bat ekartzea».
«Animatuko nuke jendea, esperientzia hau bizitzera»
Jarraitzeko asmoa dute biek, gainera: «luzatu nahi dugu bizipena. Ume hauei egiten zaien mesedea izugarria da, eta mundu guztia animatuko nuke horrelako esperientzia batean parte hartzera, behintzat bizitzan behin».
Bi hilabeteak igaro eta gero, datorren urtera arte agur esateko momentua iritsiko da, eta momentu gogorra izango dela badakite: «lehenengo egunetatik horretan pentsatu eta pena haundia sentitzen duzu. Familia bat sortzen da zurekin edukitzen duzun denboran, eta agurra latza izaten da. Pasa den astean hirurok oporretara joan ginen, Gironako kanpin batera. Familiako beste bat da, eta asko eskertzen dute umeek».
Koordinazio lanetan, Maialen Torresen lana goraipatzen dute, bost haurrak elkarrekin egoteko egiten duen begirale lanagatik; eta baita Udalaren esfortzua ere.
«Eskertzekoa da egiten duten ahalegin guztia. Udalekuak bi hilabetetan jarri dituzte, erraztasunak ematen dituzte, eta ikusten da Hernaniko Udalak konpromezu irmoa duela Sahararekin eta ume hauekin». Fatma Mohamed-Moulud eta Hayat Salma Bad aurreneko aldiz etorri dira: «biak dira herri eta kanpamendu berdinekoak», azaldu dute.
«Oso gustora etortzen naiz»
Urte gehiago daramatza etortzen, Selma Mohamed Malimnek: «nire hirugarren urtea da, azkenekoa. Oso gustora etortzen naiz, eta ederki pasatzen dut. Ekintza ugari egiten egiten ditugu», dio Selmak gaztelera argi batean: «Fatma eta Hayatek ez dute hitz egiten, baina ulertzen dute. Fatma aurreko urtean Italian egon zen», argitu dute.
Euskal Herriko eguraldi nahasira ere ohitu dira haurrak: «gu bizi garen kanpamenduan, eguzkia da beti nagusi», kontatu dute. yy