Geroko tesiak bultzatzeko helburuarekin eta ikertzaile gazteei edota hasiberriei bultzada emateko asmoz, aurten ere bi ikerketa proiektu sari izango dira esleitzeko EHUko Mikel Laboa Katedraren eta Mintzola Ahozko Lantegiaren eskutik. Ikergai nagusia bertsolaritza duten proiektuak gauzatzeko 2.000 euroko bi diru-laguntza eskainiko dira.
Lanen ikergai nagusia bertsolaritza izango da eta edozein jakintza-alorretik aztertu ahal izango da berau. Bestalde, master-amaierako lanen proiektuak lehenetsiko dira, baina beste ikerketa-lan monografiko batzuen proiektuak ere onartuko dira; nolanahi ere, unibertsitateko irakasle doktore batek bermatu behar du proiektua.
Urriaren 15era arte egin daitezke eskariak
Urriaren 15era bitarte egin ahal izango da eskaria, eta handik hilabetera argitaratuko da ebazpena. Eskariak egiteko prozedura eta informazio osoagoa topatu daiteke www.mintzola.eus atarian bertan eta www.ehu.eus/laboakatedra webgunean.