Uztaileko Osoko Bilkura lasaia izan zen, eta gai zerrendan zeuden puntu guztiak onartu ziren, eta aurkeztutako bi mozioak ere bai. Aurreko akta onartu ondoren, uztailean emandako dekretuen eta kontratazioen berri eman zen.
Udal Gobernua eta oposizioko taldeen arteko zatiketa, aurrekontua gauzatzeko arauaren aldaketaren behin betiko onarpenean ikusi zen soilik. Oposizoko talde nagusiko bozeramailearen soldataren inguruko puntua zen, eta bere garaian EAJk eta PSEk alegazioa ipini zioten, behin behineko aldaketari. Udal Gobernu taldeak esan zuen, prozedura legezkoa zela, eta alegazio atzera bota zuen.
Bestetik EAJ eta PSE-EEko bozeramaileek azpimarratu zuten, alegazoari juridikoki ez zaiola erantzunik eman, eta legezkoa den edo ez argitu gabe geratu dela: «guk ez dugu zalantzan jarri prozedura legez egin den edo ez, baizik eta aldaketa legezkoa den ala ez, eta ez dugu erantzunik jaso». Ondoren, puntua bozkatu zen eta zortzinako berdinketa egon zen, baina alkatearen kalitatezko botoak arauaren aldaketa gauzatu zuen.
«Egoera zailean daude hernaniar asko»
Hernaniko Udalaren Zerbitzu Sozialak erakundearen kreditu gehigarria bideratzeko puntua, aho batez onartu zen. Udalak kreditua gehituko du egoera larrian dagoen jendeari laguntzeko. Xabier Lertxundik adierazi zuen, aurten inoiz ikusi ez dena gertatu dela. «Ekainean aurreikusita zegoen dirua agortu da. Horrek erakusten du zein egoera zailean dauden hernaniar asko». Eusko Jaurlaritzatik jasotzen zuten, zerbitzu sozialetan egiten ziren kontratazio batzuren dirulaguntzak, baina euren aurrekontua jaitsi egin da gai horretan, eta beraz, Udalak berak egin beharko dio aurre zerbitzu horri, dirulaguntzarik jaso gabe.
Hiri hondakinak bildu eta tratatzeko Udal Ordenantza Arautzailearen Hirugarren aldaketaren hasierako onarpena, 14 aldeko boto eta bi abstentzioekin onartu zen.
Hernani Musika Eskola Publikoko zuzendaritza taldea berritzeko proposamena, eta Bake Epailea eta bere ordezkoa izendatzeko proposamena ere, aho batez onartu ziren. Nora Rey Orain Hernaniko zinegotzia, Osasun eta Gizarte Ongintzarako Udal Patronatuan zuzendaritza batzordeko kide bezala ere onartu zen.
Plenoan, bi mozio aurkeztu ziren. Lehenengoa, EH Bildu taldeak aurkeztu zuen Altsasuko gertaeren inguruan. Fiskaltzaren eskaeraren desproportzioa azpimarratu zuen, eta auzia Iruñako epaitegira eramatea eskatu zuen, solidaritatea nabarmenduz. Aurrera atera zen, aldeko 14 botorekin eta PSE-EEko bi abstentziorekin.
Emaitza berdina eduki zuen Sarek aurkeztutako mozioak, hiru puntutan. PSE-EEk eskatu zuen, ea posible zen puntuak banan-banan bozkatzea, eta Sareko oniritziarekin horrela egin zen. Lehendabiziko eta 5garren puntuak aho batez onartu ziren. Gaixotasun larriekin preso dauden Gari Arruarte eta Ibon Fernández Iradiren inguruko puntuak ziren.