Julio Gomez hernaniarrak Joxe Mari tabernan bere margoak ditu ikusgai udaran zehar. «Nahi dituenak erosi ditzazke edota erakusketa ikusi» dio margolariak. Orain 61 urte Sagastialden jaio zen eta betidanik gustatu izan zaio margotzea. «Nire bizitza guztia pasa dut margotzen» eta beti ere Hernani du ardatz nagusia.
«Paisaiak, erretratuak, gai desberdinak lantzea aukeratu nezakeen baina Hernani izan da nire pasioa». Herriko txoko guztiak margotu eta harrapatu ditu bere ohialetan.
Gainera margotzerakoan argazkietan oinarritzen da eta ez nola nahiko argazkietan. «Argazki zaharrak irudikatzen ditut nire margoetan. Herriko argazkiak hartu eta hori isladatzen dut nire lanetan».
Nafar kalea, Leoka, Tilosak... ikusi daitezke
Edozein garaiko Hernani irudikatu du, baina batez ere garai bateko herria da ikusi daitekeena bere margoetan. «Orain Joxe Marin dauden koadroetan Nafar Kalea, Tilosak, Leoka... antzeman daitezke. Nire helburua da jendeak ikusi dezala nola zen pasa den mendeko Hernani eta gu jaio baino lehenago zer itxura zuen. Gazte askok ez dute ezagutzen nolakoa zen herria eta historia erakusteko margoen bidez ere balio du erakusketak».
Hernaniko kale asko eta asko margotu ditu eta oraindik ere jarraituko du irudikatzen. Margoak saltzen ditu, baina ez da bere ogibidea. «Zaletasunagatik egiten dut. Margoak saltzen ditut baina lortzen dudan dirua materiala erosteko da».
Etxean aritzen da lanean. «Kalean egin izan dut koadroren bat edo beste, baina ez naiz hain gustora aritzen. Nahiago dut etxean, nire erritmoan aritu. Kalean jende askok ezagutzen nau eta ez da berdina».
Jendeak erosten ditu bere margoak eta esan izan diote duten balioa baino merkeago saltzen dituela. «Horrela da. Lan haundia eskatzen dute eta emaitza gustoko du erosleak. Askok esan didate garestiago ere erosiko luketela margoa, baina ni ez naiz hemendik bizi. Hori ez da nire helburua».
Goizean zehar aritzen da margotzen batez ere, baina «gauean ere jeiki naiz ohetik eta margotzen hasi. Inspirazio puntu hori etortzean aprobetxatu egin behar da». Argazkiak herriko jendeak ematen dio eta egiten dituen lanak ez dira oso haundiak izaten. «Tamaina normala dute, baina enkarguen arabera aritzen naiz batzuetan. Gustatuko litzaidake Hernaniko argazkirik zaharrena lortu eta hori margotzea. Argazkilaritzak urte asko ditu eta badaude benetan zaharrak».
Nahiz eta margoren bat errepikatu lan desberdinak egiten saiatzen da uneoro. «Beste lanen bat ere jarraituko dut udaran zehar».