Gurasosek Espainiako Senatuan salatu du erraustegiaren proiektuak ahultasun finantzieroa duela. Irailaren bukaeran salaketa Bruselara eramango du, baita Europako Parlamentura ere. GuraSOSek argi du proiektua ezingo dela egin, eta hurrengo hurratserako prestatzen ari da: Erraustegirik gabeko eta adostasuna oinarritzat izango duen akordioa, hondakinen kudeaketaren afera behin-betikoz soluzionatzeko.
GuraSOSekoak Unidos Podemos, PSOE, ERC eta EH BILDUko hainbat senatarirekin bildu ziren. Defizita eta zorpetzearen inguruko saio monografikoa zegoen, eta Montoro ministroak ere parte hartu zuen. Kontaktuak eskatuta, PP zein Cuidadanosen ordezkariei helarazi zieten dossierra. Gainera, Europari begira dituzten asmoak prestatzeko balio izan zien.
Balorazio oso positiboa
GuraSOSen balorazioa oso positiboa da, jarrera irekia eta abegikortasuna topatu zituelako. Azpimarratzekoa da Montoro ministroak berak jaso zuela dossierra. GuraSOSek salatu du erraustegiaren proiektuak zorpetzearen eta gastu publikoaren gaineko Europako zein Espainiako arautegia ez duela betetzen.
Elkarteak salatu du ez duela beharrezkoa ikusten azpiegitura, eta planifikazioa eta koordinazio falta ikusi ditu. «Balorizazio energetikoaren sektorearen patronalaren arabera Espainia osoan 17 erraustegi beharko lirateke (gaur egun 11 daude), eta EAEri 0,79 edukitzea egokituko litzaioke, eta Bizkaian badago bat».
1.000.000.000 milioiko inbertsioak justifikaziorik ez du diote. «EAEk ez du hiri hondakinen planik, eta ez da betetzen ari bere egokitzapena estatuko planari, ezta Hondakin eta Lur Kutsatuen Estatu Legeari ere. Horrek esplikatzen du zergatik ez da aztertu Zabalgarbi nahikoa ote den beharrak asetzeko».
Gainera, GuraSOSek salatu du erabateko kontrol falta dagoela milioi askoko kontratuetan. «Kontrol ezak eta iruzurrak egiturazko hedadura hartu dute, eta GHK-k ez du horren gaineko kontrolik ezarri, eta Europako arautegiak sekulako garrantzia ematen dio horri guztiari».
Eurostaten aurrean kasua salatu du
GuraSOSek Eurostaten (Europako Batzordea) aurrean kasu hau salatuko du eta agintarien eskuetan jarriko du bere eskuetan dagoen dokumentazio osoa. «Europako instantziek tamainako iruzurraz ohartuta, murrizketa sozialak eta lan erreformak ekarriko ditu. Horregatik guztiarengatik sindikatuei sindikatuen arteko ekintza bat proposatuko zaie, Europa mailakoa, horrelako iruzurrak saihesteko» adierazi dute.
Hori guztia lotuta dago Meridiami (inbertsio enpresa norvegiarra eta finantziatzaile nagusienetakoa) helarazi zaion informazioarekin.
GuraSOSek helegitea galdu du GHKren kontra Donostiako auzitegian
Administrazioarekiko Auzietarako Donostiako 3. Epaitegiak ezetsi egin du GuraSOS elkarteak jarritako errekurtsoa. Errekurtso hori jarri zen Hondakinen Kontsortzioak (GHK) 2016ko uztailaren 28an hartutako erabakiaren kontra, erabaki horren bidez onartu egin baitzen erraustegia kontratatzeko espedientea. Epaitegiak ukatu egiten du parte hartzeko eskubidea urratu denik, eta gogorarazi du Kontsortzioa Gipuzkoako Hondakinen Kudeaketako Plan Orokorra gauzatzen ari dela. Plan Orokor hori Gipuzkoako Batzar Nagusiek onartu zuten, eta bertan erraustegiaren eraikuntza aurreikusten da.
Ildo berean Aldundiak dio epaiak adierazten duela GuraSOS elkarteak nahastu egiten dituela partaidetzazko demokrazia eta demokrazia zuzena eta, halaber, «nahastu egiten dituela, oker, partaidetza politikorako eskubidea egintza administratibo batean parte hartzearekin».
«Haren helburua ez da hautesleei aurretik hartuta dagoen erabaki bat berresteko deia egitea, baizik eta interesatuta daudenek edo nahi dutenek beren iritzia eman ahal izatea eta, hala, Administrazioak informazio iturri gisa baliatu ahal izatea».
Epaiak, azkenik, ezetsi egiten du GuraSOS elkartearen errekurtsoa, eta prozesuaren kostuak egozten dizkio.
Epaiaren edukiari dagokionez, Gipuzkoako Hondakinen Kontsortzioko lehendakari eta Ingurumeneko diputatu den Asensiok azaldu du «Gurasos elkartearen propagandak eta argazkiek ezin dituztela tapatu epaiak, eta epaitegiek berretsi egin dutela gauzak ongi egiten ari direla».
Ildo beretik, foru arduradunak adierazi du erakundeek herritarren eta Batzar Nagusien mandatua bete nahi dutela, hondakinen arazoari irtenbidea emateko, teknologia onenak baliatuz eta herrialde europar aurreratuenekin bat eginez. Era berean, Gipuzkoan hondakinen kudeaketari ahalik eta gardentasun handienarekin ekiteko eta gipuzkoar guztien interes publikoa lehenesteko konpromisoa berretsi du Asensiok.