Datorren larunbatean lehertuko dira Santio jaiak, Urumea bailaran; Aranon eta Astigarragan, hain zuzen ere. Hortik aurrera, dena izango da salto, dantza, barre eta gozamen... baina lehenago ere izango dute horretarako tartea. Asteburu honetan bertan, hainbat ekintza izango dituzte.
Aranon, bihar emango diote bukaera, Pala Txapelketari. Goizeko 11:00etan hasiko dira bi finalak: Garbiñe-Axpi/Eider-Emeren nesketan, eta Loidi-Amas/Ruiz-Zubimendi mutiletan. Aurretik, hirugarren eta laugarren posturako ariko dira Amaia-Arantxa/Idoia-Naroa nesketan, eta Legarreta-Kerejeta/Gelbentzu-Mitxelena mutiletan. Bukaeran, sariak banatu eta bazkaria ere egingo dute.
Bestalde, uztailaren 22ko arkume jaterako, jarri dituzte salgai txartelak, 30 euroan: Kontsejun, Hernaniko Deportibon eta Goizuetako Amaian.
Astigarragako Krosa, gaur
Astigarragan, berriz, gaurtik izango dituzte ekintzak. Herri Krosa egingo dute arratsaldean, 17:30etan hasita.
Bihar, berriz, kirolekin jarraituko dute goizean, Zarkumendegiko Trial Txapelketarekin, eta maila haundiko esku pelota partiduekin: Xala eta Titin III profesional ohiak eta, herriko pelotariak ariko dira, besteak beste, Txomiñenen.
Eta iluntzean, 19:00etan hasita, bi kontzertu izango dira Joseba Barandiaran plazan, Urumea Blues&Jazz Jaialdiaren barruan.
SANTIO JAIAK ASTIGARRAGAN
Gaur, uztailak 15
17:30, Astigarragako XV. Herri Krosa (7,3 kilometro). Izena emateko: Apeztegi plazan, 16:00etatik aurrera.
Bihar, uztailak 16
09:30, Astigarragako XII. Trial Txapelketa, Zarkumendegin.
10:30, Esku pelota jaialdia: Mundarro pelota eskolako gaztetxoak; Xala-Sanchez/ Loidi-Bergera; Barandiaran-Gurutzealde/Titin III-Aizpitarte.
19:00-22:00, III. Urumea Blues&Jazz Jaialdia: Mujo Hand eta FM Trio taldeak, Joseba Barandiaran plazan.
SANTIO JAIAK ARANON
Bihar, uztailak 16
11:00, Aranoko XVI. Pala Txapelketaren finalak.
Ostiralean, uztailak 21
22:00, XXXV. Mus Txapelketa, San Roke elkarteak antolatuta.