Podiumera igotzeko aukera izan zuten aurreko asteburuan, beste behin, txirrindulari astigartarrek. Izan ere, kadeteetan zein jubeniletan, taldekako garaipena lortu zuten, Donosti Berrirekin.
Mendaron nagusitu ziren jubenilak, Urko Semperena ere tartean zela. Kontrol lanean aritu zen astigartarra. Izan ere, bi taldekide sartu ziren 17 laguneko ihesaldian, garaipena jokatuko zuen taldetxoan, hain justu: Aitor Larrañagak irabazi egin zuen, eta Manex Alkorta laugarren izan zen.
Kadeteak, berriz, Arrasaten aritu ziren. Hirutan ibili zen Telmo Semperena lasterketa buruan, baina arazo teknikoak tarteko eta nekea nabarituta, lehiatik kanpo geratu zen azkeneko igoeran.
Beste lau proba izango dituzte asteburu honetan. Gaur, Gipuzkoako Taldekako Erlojupeko Txapelketa izango dute Alegian, kadete zein jubenilek. Eta bihar, Aiegin ariko dira jubenilak, eta Azpeitian kadeteak.