«Ondo pasatzeko asmoz» eta ezer irabazteko susmorik gabe aurkeztu zen Maialen Sagües hernaniarra, Gaueko komiki dendan jokatu zen Catan mahai jolasaren txapelketara. Eta bertan bigarren sailkatu ondoren, bi hilabete beranduago, Madrilerako bidea hartuko du asteburuan: Estatuko finala jokatuko du igandean, goizeko 09:00etan hasita, WeAre Chamartin hotelean.
Estatuko Catan Txapelketako finalean izango zara. Ilusioa egingo zizun!
Bai, noski! Gogoz nago asteburuan hara joan eta esperientzia bizitzeko.
Bigarren sailkatu zinen zonaldeko kanporaketan. Nola gogoratzen duzu egun hura? Berdindua izan zen finala, ezta?
Oso ondo pasa nuen txapelketan. Lagunekin joan nintzen eta lehenengo erronda haien aurka jolastu nuen. Horrela hasita, lotsak galdu eta gogotsu iritsi nintzen finalera. Gainera, Nora (beste partida batean egondako kidea), nirekin batera iritsi zen finalera. Ez zen partida erraza izan, konpetentzia gogorra izan nuen. Berdintsu ibili ginen laurok denbora guztian, puntuengatik borrokan, eta azken rekuentoan zorte hutsez atera nuen abantaila txikia.
«Lagunartean ikasi nuen jolasten, eta segituan hartu nion gustua; jolasa erosi, eta behin baino gehiagotan geratu izan gara etxean, gaueko ordu txikitan, partida infinituekin»
Aurretik ere Catan mahai jolasean aritutakoa zara? Noiztik jokatzen duzu?
Lagunartean ikasi nuen jolasten, aurreko urtean. Segituan hartu nion gustua, jolasa erosi eta behin baino gehiagotan geratu izan gara etxean, gaueko ordu txikitan, partida infinituekin. Hortaz aparte, ez naiz inoiz konpetizio edo txapelketetan ibili.
Eta espero zenuen hain ondo aritzea txapelketan?
Egia esan, ez. Eguna pasatzeko plan dibertigarri bat bezala hartu nuen, eta ez nuen uste zer edo zer irabaziko nuenik.
Eta Madrilgo finalean, zer espero duzu?
Konpetentzia aldetik ez daukat espero berezirik, han egotearekin pozik nago jada. Hori bai, espazio mixtoa izatea nahiko nuke, eta emakumezko jokalariek presentzia haundia eduki dezaten espero dut. Estatu mailako finala da, eta punta guztietatik iritsiko da jendea.
Zein formatu izango du azkeneko faseak? Nola antolatuko da txapelketa?
Dakidanez, hiru erronda izango dira semifinalerako. Ondoren, 16 jokalariren artean aterako da irabazlea.
Ekintza gehiago ere izango dira asteburu horretan, txapelketaren bueltan?
Nirekin Hernaniko txapelketan egon ziren beste bi lagunekin joango naiz madrilera, eta dakidanez, beste mahai jokoetako txapelketak ere egingo dira aldi berean. Carcassone jolaserako gonbidapena jaso dugu, eta agian horretan ere bukatuko dugu.
«Dakidanez, hiru erronda izango dira semifinaletarako. Gero, 16 jokalariren artean aterako da irabazlea»
Irabazleak Europako Txapelketarako txartela lortuko du… Izugarria izango litzateke lortzea, ezta?
Bai, ezagutzen ez dudan nire buruaren alde bat topatuko dut haraino iristen banaiz (barrez).
Nolakoa da Catan mahai jolasa, eta zein da helburua?
Catana mahai joko estrategikoa da. Jokoaren helburua da, irabazitako errekurtso ezberdinekin terrenoaren azalera irabaziz eta eraikiz, puntuak lortzea. Partidak 45 minututik hiru ordura iritsi daitezke; eta horietako bat baino gehiago jokatu izan dut nik. Jokalarien arteko interakzioa, truekeak ere ematen dira denbora guztian. Oso dibertigarria den jokoa iruditzen zait.