Gipuzkoan zehar, lurraldea zeharkatuko duen Ikasgela Ibiltaria jarri zen martxan pasa den astean, eta Hernanira, uztailaren 21ean, ostiralean, iritsiko da; bi egunez egongo da herrian. Autobusaren barruan antolatuko dira taldeen bisitaldiak, gazteei eta hezitzaileei mundu digitalean behar bezala moldatzeko tresnak eskaintzeko.
Kode Eskolak zuzenduko ditu programazio tailerrak: 45 bat minutu iraungo dute, eta doanekoak izango dira guztiz. Hori bai, aurrez eman beharko da izena, haietan parte hartu ahal izateko. Izena eman behar da www.gipuzkoangazte.eus/eu/kultura-digitala/ikasgela-ibiltaria webgunean. Lehen Hezkuntza, Bigarren Hezkuntza eta Heziketa Bereziko ikasle eta irakasleen sentsibilizaziorako heziketa kanpaina da, batez ere, Ikasgela Ibiltaria. Kultura Digital@ programaren atala da proiektu hau.
Ikasgela Ibiltarian parte hartzeko, aurrez eman behar da izena, interneten.
Aldundiak, Orona Fundazioak eta Kode-Eskola sustatua da, eta Irizar enpresaren laguntza ere jaso du. Alabaina, gizarte orokorrera, bertan diharduten talde eta elkarteetara, ere iritsi nahi du kanpaina honek, programazioaren ikaskuntzaren bitartez lehen adinetan (8-16 urte) dauden haur eta gazteen artean, teknologien erabilera egokia eta sortzailea bultzatzeko eta, bidenabar, teknologiaren aldeko jakinmina eta bokazioa sustatzeko.
Gainera, pertsona ezinduen behar eta premietara ere egokitua da Ikasgela Ibiltaria, haien irisgarritasuna eta jarduneko partehartzea erraztuko dituen aldetik.