Harreman berriak sortu eta estutu dituzte ikasturte honetan, Hernani BHIko ikasleek. Oraingoan, aniztasun taldekoak izan dira, Zarauzko Lizardi ikastetxeko talde batekin harremanetan egon direnak, kurtsoan zehar.
Elkar ezagutzen hasteko, eskutitza bidali zioten elkarri, ikasturte hasieran, bi ikastetxeetakoek; Zarauzkoek Hernanikoei aurrena, eta alderantziz ondoren. Eta hortik aurrera, talde bakoitzak bere afizioen berri eman dio besteari, bideo bat eginez edota argazkiak bidaliz elkarri.
Eta ikasturte osoko harreman hori borobiltzeko, elkartrukea egin dute. Zarauzkoak bisitan etorri ziren Hernanira, aurrena, eta herriko toki interesgarrienak erakutsi zizkieten bertakoek, baita hamaiketakoa eskaini ere. Eta ondoren, hernaniarrak joan ziren Zarautzera bisitan. Eta bisita gidatua egin bakarrik ez, Zarauzko hondartzan bainatzeko aukera ere izan zuten ikasleek, eguraldi ona lagun!
«Esperientzia ederra izan da»
Institututik nabarmendu dute, «esperientzia ederra» izan dela, aukera eman dielako «gu bezalako beste gazte batzuk ezagutzeko», eta baita inguruko herri bat ere, bertakoen eskutik.