Bi kontratu publiko berritu dituzte egun hauetan, Hernaniko Udaleko Zerbitzu Sozialek: etxez etxeko laguntza zerbitzuarena, eta zaharren egoitzako sukalde zerbitzuarena.
Udalak azaldu duenez, lan baldintza hobeak izango dituzte orain, zerbitzu horiek emango dituzten langileek. Izan ere, klausula sozialak sartu zituen, bi kontratazio horien pleguetan.
Etxez etxeko laguntza zerbitzua, Eulen enpresak
Eulen enpresa izango da, lehiaketa irabazita, etxez etxeko laguntza zerbitzua eskainiko duena. Pleguetan ezarritako betebeharrei esker, «50 langileri baino gehiagori hobetuko dizkie lan baldintzak», Udalak azaldu duenez. Eta bi nabarmendu ditu: soldataren igoera eta lanaldiaren murrizketa.
Izan ere, 2017an %3,5 igoko die soldata, 2018an %2, eta 2019 eta 2020an KPIa (%1eko igoera bermatuta izango dute). «Esleipen berria martxan jartzean, lanaldi osoan dagoen langile batek ia 600 euro gehiago kobratuko ditu 2017an, eta beste 350 euro gehiago 2018an. Bi urtetan, ia 1.000 euro gehiago», nabarmendu du Udalak.
Lanaldiaren murrizketari dagokionez, berriz, adostu dute urteko lanaldia pixkanaka murrizten joatea, 2020an 1.600 ordura iristeraino. «Emandako pauso honekin, zaintzara dedikatzen diren langile horien lana, emakumeak guztiak, aitortu eta, hitzarmen kolektiboaren faltan, haien baldintzak hobetu dira», adierazi du.
Auzo Lagun Kooperatibaren esku, egoitzako sukaldea
Zaharren egoitzako sukaldea, berriz, Auzo Lagun Kooperatibari esleitu diote Zerbitzu Sozialek. Horretarako, hiru irizpide nagusi hartu dituzte kontuan: kalitatea, gertutasuna eta ingurumena.
Eskatu dute, batetik, kalitate estandarretako jakiak eta genetikoki manipulatu gabeko elikagaiak erabiltzea, ekologikoak izatea lehenetsiz. Bestetik, barazkiak eskualdekoak izatea, bertako nekazaritzaren aldeko apustua eginez. Eta azkenik, garraiorako erabilitako ontziak berrerabilgarriak izatea; eta debekatu die, besteak beste, modu agresiboan arrantzatutako arrainekin sukaldatzea.
Sukalde horrek, egoitzari bakarrik ez, eguneko zentroari eta jangela sozialari ere ematen die zerbitzua, eta guztira, 229.556 otordu prestatzen ditu urtean.