Datorren ikasturtean garatu nahi dituen bi proiektuak aukeratu ditu Tabakalerak, Eskola aldiriak deialdiaren hirugarren edizio honetara aurkeztu diren ikastetxeen artean, eta aukeratuetako bat izan da Txirrita eskolak aurkeztu duena: Harremangune berri baterantz. Bestea, Eskoriatzako Arizmendi eskolarena izan da.
Jolasgune berria
Tabakalerako hezkuntza arloak bultzatzen duen deialdi honen helburua da Tabakalera eta hezkuntza zentroen artean epe luzeko aliantzak eraikitzea, eta artea eta hezkuntza uztartzen dituen poriektu kolaboratibo bat garatzea.
Txirrita eskolaren kasuan, eskolak daukan behar edo desio batetik abiatuta, hezkuntza komunitatean harremanak gertatzen diren espazioarekin lotura daukan proiektua da bultzatuko dena: jolastokia berrituko da. Horrela, ikastetxea eta auzoaren arteko harremanak sustatzeko espazio berri bat sortu nahi da, aisialdi, kultur eta arte esperientzien bitartez. Zer motatako aisialdi eta kultur dinamikak nahi ditugu? galderari erantzun diote, horretarako.
Komunitate osoaren babesa
Atzo bertan eman zuen berria jakitera, Tabakalerak, eta ikastetxeak azaldu du proiektuak dagoeneko komunitate osoaren babesa daukala: eskola, guraso, Udala... «Gure Hezkuntza Proiektua berrikusten hasi ginenean, denon artean landu genuen zein behar genituen, eta detektatu genuen jolastokia berritzeko beharra. Horrela aurkeztu ginen Tabakalerako deialdira. 7.000 euroko aurrekontua izango dugu ikasturte osoan zehar proiektua garatzeko, eta guraso eta Udalarekin ere landuko dugu. Auzoarentzako ere izango da».