Asteartean hil zen 69 urteko hernaniarra, «2017an Asviamie elkartearekin harremanetan zegoen amiantoaren 11garren biktima» dela azaldu du Asviamie, amiantoaren biktimen euskal elkarteak.
Biriketako minbiziak eraginda hil zen, «1962 eta 1989 urteen artean Hernaniko Mendia-Gureola Scott paper fabrikan lan egitean amiantoarekin kontaktuan egon zelako». Asviamieren esanetan, «ez zuen jaso minbizia arriskuari buruzko informaziorik, ez eta arnas babeserako baliabiderik». 1989an Lan Dermatosia eta Lanerako Ezintasun Osoa medio, lanpostua aldatu behar izan zuen, eta 1993an lanetik bota zuten. Pasa den udan, «sindikatuen aholkularitzari esker», lanbidearen eraginez sortutako gaixotasunak eragindako lanerako ezintasun osoa lortu zuen, eta horrela, pentsioa hobetu zuen. Asviamiek azaldu du lanean segiko duela «erakundeen isiltasunaren aurrean, bereziki Eusko Jaurlaritzako osasun arduradunen aurrean».
AMR Refractarios Aristegi enpresari, 168.000 euroko zigorra
Hain zuzen, Asviamiek egindako borrokari esker, Krosaki AMR Refractarios SA (lehen AMR Refractarios Aristegi) enpresa zigortu du EAEko Auzitegi Gorenak, 2014an hildako langile baten familiari 168.759,6 euro eta interesak ordaintzera.
Langile honek 1977 eta 1990 urteen artean egin zuen lan AMR Refractarios Aristegin, eta lanerako ezintasun osoa eman zioten biriketako enfisema baten ondorioz, «ohiko gaixotasuna zelakoan».
2014ko urrian hil eta bost hilabetera, Gizarte Segurantzako Institutu Nazionalak onartu zuen laneko gaixotasunak eragindako heriotza izan zela, eta Osalanen informearen arabera, «zarata giroak eta hautsak, baimentzen den muga gainditzen zuten. Enpresak ez zuen ebaluaziorik egiten eta ez zuen silizea ‘hauts geldo’ gisa onartzen».
Asviamiek «sententzia positiboa» dela dio, «nahiz eta ez den amiantoak eragindako heriotza bat, AMR Refractarioseko langileek pairatu zituzten osasunerako kaltegarriak ziren lan baldintzen aurrean justizia egiten baitu, langileen osasunaren babesarekiko enpresen utzikeriaren aurrean».