Datorren hilaren 28an izango da LGTBI+ kolektiboaren eskubideen aldeko eguna, eta aldarri horrekin bat eginez, ekimen berezi bat antolatuko du Udalak, asteazkeneko Plenoan EH Bilduk aurkeztutako mozio bat aho batez onartu ondoren. Horrela, beraz, datorren asteazkenean, iluntzean, Pelotalekuko kanpoko harmailetara igotzeko dauden koskak kolektiboaren koloreekin pintatuko dituzte.
EH Bilduk, hiru abstentzio
Aurreko aktaren onarpenaren ondoren, EH Bilduren abstentzioarekin, eta EAJ eta PSE-EE udal taldeen babesarekin, onartu zituzten aurreneko hiru puntuak: 2017ko udal lanpostu eta plantillaren onarpena; Plan Orokorraren Zarkumendegi Zabalpena eremuaren aldaketa; eta Garbitaniak aurkeztutako auzi-errekurtsora bertaratzea.
Zarkumendegiko Zabalpenaren eremuko Plan Orokorreko aldaketaren inguruko botoa aldatzeko aukera adierazi zuen EH Bilduk: «alegazioa sartu genuen Gruas Zapiainen aisialdi gune bat eraikitzeko, herriaren sarrera horri beste itxura bat emateko. Hori onartuz gero, alde bozkatuko dugu», azaldu zuen Andoni Gartzia zinegotziak. Zorione Etxezarraga alkateak erantzun zion oraindik ez dutela aldatuko, «baina konpromisoa hartu dugu hurrengo berrikuspenean proposamen hori txertatzeko».
Bestalde, Garbitaniaren errekurtsoaren harira, Gartziak argi adierazi zuen: «hau ez zen honaino iritsi behar; Udalak baditu tresnak honi aurre egiteko. Udal gobernuaren burugogorkeriagatik gertatu da hau». Etxezarragak, ordea, adierazi zuen gai honetan «Udalak herritarren interesak defenditu» dituela.
Hitzarmenak, eztabaida
Ergobia ibilbideko hirigintza-hitzarmenak sorrarazi zuen EH Bildu eta Udal gobernuaren arteko eztabaida sutsuena. EAJren gobernuaren ustez, hitzarmenak lau marra gorri ditu: «programan genioen bezala, legealdian babes ofizialeko 40 etxebizitza egiteko bidea da; Kultur Etxea ez da proposatzen zena baino txikiagoa; eta herriari ibaia irekitzeko aukera bermatzen da». Horrela, Etxezarragak esan zuenez, «interes publikoa bermatua geratzen da».
EH Bilduri, aldiz, aldaketa batzuek zalantza sortzen diote: babes ofizialeko etxebizitzak 40tik 22ra pasatzea, eraikita egongo diren jakin gabe, adibidez. Horrez gain, aipatu zuten aurreko hitzarmenean parkea aipatzen zela, eta orain haunditu egin dela, «hain sutsuki defendatu duzuen AHTaren geltokia ez delako egingo». Azkenik, galdetu zuten «ea zer arazo dagoen Haur Eskolako 800 metroko lokala hitzarmenean txertatzeko». Hitzarmena, beraz, EAJ eta PSE-EEren aldeko botoekin onartu zuten.
Gai gehiago, onartuta
Beste hainbat gai ere landu ziren; onartutakoak, denak: Txalaka-Oialumeko Plan Berezia; Ubarburu Zabalpenari dagokion aldaketa; abereen inguruko ordenantza; baita Harituzen mozioa eta EH Bilduk eta PSE-EEk batera aurkeztutakoa ere. Bertan Herri Eskolaren haundipena nola egin zehazten zuten. «Eskatu izan balitzaigu parte hartzeko, parte hartuko genuke», onartu zuen Alkateak. Izan ere, diote, «gai honekin ez dugu alderdikeriarik egin nahi».