Bigarrenez, Blogetan! Euskal Blogariak lehian lehiaketa antolatu dute aurten Azkue Fundazioak eta Argiak, «euskerazko blogak zabaldu, sustatu eta ezagutarazteko, eta bide batez, zenbat blog dauden euskeraz, zein gai lantzen dituzten eta beste hainbat detaileri buruzko azterketa egiteko».
Hala azaldu du Iurdana Acasuso, Azkue Fundazioko zuzendariak. Azterketatik Acasusok ondorioztatu du: «2001. urtean lehenengo bloga sortu zenetik gaur arte aldaketa nabarmenak eman dira euskal blogosferan». Horietako batzuk dira, proposamen pertsonal eta kolaboratiboak sortu izana, plataformak erabiltzen hastea, puntu eus domeinua sortzea... Baina gehitu du: «eraldaketa honek oraindik badu garapenerako espazioa. Blogintzak oraindik badu euskaldunoi zer eskaini».
Horregatik, Azkue Fundazioak hainbat konpromiso hartu dituela berretsi du. Besteak beste, erabiltzaileak eta sortzaileak ahalduntzeko trebakuntza ekintzak, urrian; euskal erabiltzaileen artean nabigazioa euskeraz bultzatzeko sentsibilizazio lana; eta blogari komunitatea babesteko eta hazteko euskerazko blogarien ataria sortzea: www.blogetan.eus.
*Info+: www.kronika.eus