Festa giroan igaro zuten atzoko eguna, Aranon eta Goizuetan, Gure Esku Dagok antolatutako herri galdeketa tarteko. Eta asko izan ziren, bi herrietan, erabakiaren festa horretan parte hartu zutenak: %60tik gorakoa izan zen partehartzea bietan; beste inon baino haundiagoa, atzokoan. Izan ere, 24 herritan izan zen galdeketa, eta Aranon eta Goizuetan lortu ziren partehartze datu nabarmenenak: 405 lagunek eman zuten botoa Goizuetan (%63,48), eta 59 lagunek Aranon (%61,46).
Baiezkoa nagusi, bi galderetan
Bi galdera zeuzkaten erantzuteko, eta bi galderetan, baiezkoa izan zen nagusi, bai Aranon eta bai Goizuetan. Aurrenekoari (Nahi al duzu Nafarroako herritarrok gure etorkizun politikoa modu askean erabakitzea?), %95ak erantzun zion baietz Goizuetan (384 boto), eta %92ak Aranon (54 boto).
Eta bigarren galderari, bakarrik erantzun behar zioten, aurrenekoan baiezkoa eman zutenek. Hauxe zen galdera: Nahi al duzu Euskal Herri libre bateko herritarra izan? Eta horretan ere, nabarmena izan zen baiezkoaren aldeko hautua: %96ak Goizuetan (368 boto), eta %91k Aranon (49 boto).
Mendialde osoa hartuta ere, ez ziren bestelakoak izan datuak. Partehartzea %35,62koa izan zen, hori bai; baina bozka eman zutenen artean, %90,70ak bi galderetan erantzun zuen baiezkoa.