«Eskola epe motzean txiki geratu delako kezkatuta», proposamena aurkeztu dute Udalean, mozio bateratu gisa, Astigarragako EH Bilduk eta PSE-EEk, arazoari konponbidea ematen hasteko. Azaldu dutenez, «egiteko erraza, arrazoizkoa eta bideragarria» da proposamena.
«Badakigu hau ez dela guztiaren soluzioa, baina eskolak behar duen soluzioaren ezinbesteko aurreneko urratsa da», nabarmendu dute. Epe motzean bi arazo aurreikusi dituzte: txikien jangela txiki geratuko dela, eta 2019-2020rako ikasgela bat gehiago beharko dela.
Hori horrela, eskola 165 metro karratu inguru haunditzea proposatu dute, atzealdeko jolastokian: «beheko solairuan, txikien jangela haunditzeko jolastoki zati bat hartuko litzateke, eta gainontzekoa jolastoki estali bezala mantendu; eta estalpearen gainean, bi solairu lortuko lirateke, bina ikasgelarekin, guztira lau ikasgela. Gutxi gorabehera, 500.000 euroko kostua izango luke, eta Hezkuntza Sailaren urteroko dirulaguntzetara aurkezteko aukera legoke». Nabarmendu dute, hori bai, arazoak konpontzeko aurreneko fasea litzatekela: «baina EAJk, hori aipatu gabe, proposamena eskasa dela ziurtatu du», kritikatu dute.
«Laugarren solairua gehituta, beharrezko 10 ikasgelak lortuko lirateke guztira»
Hain justu, fase horren ondoren, beste bat gauzatu beharko dela diote: «eskolaren azkeneko haundipenean aurreikusi zen laugarren solairua gehituta, beste sei ikasgela lortuko lirateke; guztira, epe ertainean beharko diren 10 ikasgelak. Eta horrekin, 2022-2023rako espazio arazoak bideratuko lirateke».
Bestalde, bi alderdiek adierazi dute, EAJren asmoa, eraikin berri independente bat egitekoa, iruditzen zaiela «soluzio zurruna, garestia, dirulaguntzekin finantzatu ezin dena eta paisai inpaktu nabarmena izango lukeena». Izan ere, argitu dute Hezkuntza Sailak ez dituela eraikin berriak diruz laguntzen, «nahiz eta EAJk ziurtatu duen proiektua aurkeztuko duela. Beraz, Udalak finantzatu beharko luke oso-osorik».
Horren aurrean, bere proposamena berretsi dute EH Bilduk eta PSE-EEk, eskolako zuzendaritzak eta Guraso Elkarteak ere «begi onez» ikusten dutelako. Azaldu dute, alderdi guztien adostasuna lortzea zela onena, eta horregatik ez dutela publiko egin orain arte; baina EAJren aldetik, «prentsan adierazitako gutxiespena» bakarrik jaso dutela. EH Bildu eta PSE-EE pozik azaldu dira, «desberdintasun haundiak» izan arren, herriarentzat estrategikoak diren proiektuetan adostasuna lortu dutelako beste behin.