RAMOS eta Zubimendi hernaniarrak aurten ere Tilos 7 Pasa txapelketako finalera sailkatzea lortu dute finalerdian Aroztegi-Aroztegi bikote urnietarrari 22-13 irabazi eta gero. Finalean Salaberria eta Gastesi izango dituzte parean. Elejalde-Navarro faboritoak kanporatu dituzte (22-21 eta larunbateko finalean lehia polita espero da. Ramos eta Zubimendi azken hiru urteetako txapeldunak dira eta laugarrena nahi dute.
Gaur, nesken finalerdiak
Mutilen erreleboa gaur neskek hartuko dute beraien txapelketako finalerdiekin. Lehenengo partiduan, 19:00etan, Alaitz eta Idoia, Uzkudun eta Fernándezen aurka jokatuko dute. 20:00etan hasiko da bigarren finalerdia eta Leire-Ixone bikoteak Urien-Otaegi dituzte aurkari. Bi finalerdiak oso parekatuta daude eta ez da faborito argirik ikusten. Alaitz-Idoia ama-alaba bikotea da aurreko urteko txapelduna eta denek irabazi nahi diete. Lehenengo finalerdian tanto politak ikusteko aukera izango da bi aurrelarien artean.
Bigarrenean berriz atzeko koadroetan erabaki daiteke, bi atzelariak jotzaile bikainak dira eta nor baino nor arituko dira ea nork agindu.
Mutilen bigarren mailako txapelketan Galdos eta Juarez finalean dira eta atzo ilunabarrean jokatu zuten bigarren finalerdia Irazustabarrenak eta Lujanbiok, Loidi eta Amasen kontra.
Larunbateko finalak 17:00etan hasiko dira Tilosetan.