«Europar Batasunaren eta Espainiako gobernuaren migrazio, asilo eta mugetako kontrol politikak salatzeko», Mugak Zabalduz karabana antolatu dute uztailerako.
Euskal Herritik eta Espainiako Estatutik abiatuko da karabana, eta astebeteko bidaia egingo du, Europako Hegoaldeko Mugara, Melillara, iritsi arte. Uztailaren 14tik 22ra izango da, eta tarte horretan, geldialdiak eta ekitaldiak egingo dituzte Madrilen, Sevillan, Tarifan, Melillan, Almerian eta Nijarren.
Uztailaren 14ko gauean elkartuko dira denak Madrilen, baina aurretik, Euskal Herritik doazenak Bardeetara joango dira, OTANen aireko armadaren entrenamendurako poligonora, gerraren kontrako ekitaldi bat egitera.
Parte hartzeko deia, gipuzkoarrei
Karabanarekin bat egin dute Ongi Etorri Errefuxiatuak Gipuzkoa taldekoek, eta parte hartzeko deia luzatu diete herritarrei: «Gipuzkoatik autobus bat bete nahiko genuke, gure erronka baita Euskal Herriko probintzia bakoitzetik autobus bana ateratzea», azaldu dute.
Izenemateak, interneten
Parte hartu nahi duenak, ekainaren 30era arte dauka epea izena emateko, internet bidez: abriendofronteras.net web orrian; eta ingresoa egin. 200 euro dira, autobusa eta ferrya barne. Lo-zakua eta esterilla eraman behar dira.
Informazio gehiago: onetergi@gmail.com, edo Ongi Etorri Errefuxiatuak Gipuzkoa taldearen Facebookean.