Aurreko asteburuan Asier Ormazabal preso hernaniarraren lagunei gertatutako istripuaren bueltan, «elkartasuna» adierazi nahi izan die Hernaniko Sortuk «istripuan zauritutako lagunei»: «pozten gara bizirik daudelako, eta lehenbailehen osa daitezela opa diegu». Era berean, elkartasuna adierazi diote Asier Ormazabal berari ere.
«Dispertsioa krimen bat da»
Bide batez, dispertsio egoera salatu dute: «Espainiak eta Frantziak aplikatzen duten dispertsioa krimen bat da. Senitarteko eta lagunak kondenatzen ditu kilometroak eta kilometroak egitera, orduak eta orduak errepidean pasatzera, eta jakina, istripuen errusiar erruleta norbaiti beti tokatzen zaio, kasu honetan Asier Ormazabalen lagunei». Horren aurrean, diote, «betzuei, ordea, ez zaiela inporta dirudi: Espainiako gobernuak aurkeztutako aurrekontuan babestuko dituzte».
Ormazabal, 20 urte kartzelan
Asier Ormazabalen egoera ere, azaldu dute: «Ormazabalek aurten 20 urte beteko ditu kartzelan, eta Teruelgo kartzelan dagoen euskal preso politiko bakarra da. Lege zaharrarekin kondenatua dagoenez, ohiko erredentzioak aplikatuta bakarrik ere kalean egon beharko luke. Baina euskal preso politikoei ezartzen zaien legea nahierara moldatzen dute estatuek: Salbuespenezko legeak egiten dituzte, eta horrek ere balio ez badu, akusazio berriak ‘eraikitzen’ dituzte, edo kondena bera bi aldiz betetzera behartu».