Prentsaurrekoa egin zuen EH Bilduk asteazkenean, Elio-enea eta Larraburu inguruko lurrak Astigarragako ondarera pasatzeko dagoen aukera baloratzeko. Andoni Gartzia bozeramaileak azaldu zuen «azken Plenoan jakin» zutela honen berri, eta azpimarratu zuen, EH Bildu izan dela «gai honi soluzioa aurkitu behar izan» diona.
Era berean, ekainaren 13an bi urte beteko dira Udalean korporazio berria sartu zela, eta ekainaren 30ean, berriz, Astigarraga berriro herri eginda osatutako aurreneko korporazioak 30 urte beteko ditu. Data horiek aprobetxatuta hainbat ekimen zehaztu ditu EH Blduk.
«Astigarragaren ondarea eta duintasuna babestea» eta «Garraio Hiriaren aurka egitea», helburu
Astigarraga berriro herri bilakatu zela 30 urte pasa dira, eta ordutik, gatazka izan du Donostiarekin, lur batzuen jabegoaren inguruan. Baina «badirudi konponbidea iritsi dela», azaldu du EH Bilduk.
Txoritokietako gotorlekuaren magalean, Elio-enea eta Larraburu baserrien inguruan dagoen lur eremua Astigarragako Udalari dagokiola baieztatu du Euskadiko Auzitegi Nagusiak. Gaur egun, Donostiako bigarren zinturoiak bitan banatzen du lur-eremu hau. «Guztira, 349.741m2 dira, Anoetako 49 futbol-zelaiaren adinako azalera».
EH Bilduren esanetan, «Udalak aurreko legealdira arte ez zion inoiz gaiari seriotasunez heldu», eta horregatik, EH Bilduko udal-gobernuak «lurrak Astigarragaren jabegora pasatzeko eskaera formala egin zuen». Helburuak hiru zirela ere zehaztu du: «injustiziari aurre egin eta Astigarragaren ondarea eta duintasuna babestea; gai honi behingoz soluzio bat aurkitzea; eta azkenik, bertan kokatzea aurreikusten zen Garraio Hiriaren aurka indar gehiagorekin egin ahal izatea».
Hasieran Donostiako idazkariak ezezkoa eman zion eskaerari, eta EH Bilduk «epaitegietara eramatea erabaki zuen». Orain Euskadiko Auzitegi Nagusiak arrazoia eman dio Astigarragako Udalari, eta Donostiako Udalak oraindik errekurtsoa aurkez badezake ere, badirudi «prozedurak itxura ona duela», EH Bilduren esanetan. Horrela, zehaztu du, «EAJren ausardia falta eta Astigarragaren ondarearen aldeko apustu sendorik gabeko urteen ostean, EH Bildu izan da gai honi soluzioa aurkitu behar izan diona».
30garren urteurrena
Berri hau «Astigarragak 30 urte betetzeagatik jaso duen izugarrizko oparia» dela ere azaldu zuen EH Bilduk prentsaurrekoan, eta horren harira, hainbat ekimen antolatu dituela ere jakinarazi zuen, herritarrak parte hartzera gonbidatzearekin batera.
Batetik, legealdi erdiaren balorazioak egiteko bilerak deitu ditu. Bestetik, erkausketa ibiltaria jarriko du. Eta azkenik, ekainaren 30ean festa egingo du, arratsaldez. Besteak beste, Astigarragako aurreneko korporazioko (1987-1991) kideak omenduko ditu: Antton Arka alkatea, Martin Agirre, Antton Irazustabarrena, Mikel Larrañaga eta Maria Luisa Arregi. Korporazio hura osatu zuten baita ere Ricardo Arrizabalagak, Bixente Arrizabalagak, Mikel Zabalak, Emilen Arzallusek, Martin Arregik eta Juar Arzamendik.
DESANEXIOTIK 30 URTE
Ekainak 13, 19:00etan udaletxeko plazan, legealdi erdiko balorazio batzarra. Gaiak: Kirolak, Urumea Berri proiektua, Presoak.
Ekainak 20, 19:00etan udaletxeko plazan, legealdi erdiko balorazio batzarra. Gaiak: Hezkuntza, Gazteak eta Obrak eta Zerbitzuak.
Astigarraga, 30 urteetan zehar, erakusketa ibiltaria:
- Ekainak 27, Arrobitxulon, 19:00-21:00.
- Ekainak 28, Ergobian, 19:00-21:00.
- Ekainak 29, Kontxa Etxeberria plazan (Urumea Berri), 19:00-21:00.
- Ekainak 30, Joseba Barandiaran plazan.
- 18:00-20:00: Astigarraga, 30 urteetan zehar erakusketa eta legealdi erdiko balorazioaren itxiera (zaintza zerbitzua izango da).
- 20:00-20:15 Presoen aldeko kontzentrazioa.
- 20:15-20:30 Aurreneko korporazioko zinegotziei omenaldia.
- 20:30-23:00 pintxo festa, musikaz girotua (5 euro).