Eskola Agenda 21 proiektuaren deiari kasu eginez, udaletxeko pleno-aretoan bildu ziren atzo herriko ikasleen ordezkariak, Luis Intxauspe alkateari eta Esti Aldeiturriaga eta Koro Etxeberria zinegotziei beren proposamenak luzatzeko. Oraingo honetan, Mugikortasun Jasangarriaren gaia landu dute.
34 proposamen, ikasleek
Ikasturte osoan zehar gaia sakonean landu dute herriko ikastetxeetako LH, DBH, Batxilergoa eta Lanbide Heziketako 2.500 ikaslek. Ondoren, maiatzaren bukaeran, ikasleen ordezkariak bildu eta Udalari egin beharreko 34 proposamenak zehaztu zituzten.
Ikasleen ordezkariek 34 proposamen aurkeztu zituzten atzoko zitan.
Horretarako, horiek guztiak bost azpigaietan banatu dituzte: kontzientziazio kanpainak, irisgarritasuna herrian, ibilgailuak herri barruan, garraio publikoa, eta bizikletak eta bidegorriak.
Horien artean, badaude batzuk auzoetako arazoak konpontzeko bideratutakoak: Osiñagako garraio publikoa hobetzea, Karabeleko errotondako oinezkoen bidea konpontzea...
Beste batzuk, segurtasunaren ingurukoak: gune arriskutsuak atzematea, espaloiak egokitzea, bidegorriak egoera onean mantentzea...