Hiri hondakinak biltzeko ordenantza aldatu izana, «EAJ eta PSE-EEren aldeko eta EH Bilduren kontrako botoekin», kritikatu dio EH Bilduk EAJri, prentsa ohar bidez. Lau alegazio aurkeztu dituela ere jakinarazi du, horietako hiru, «proposamen zehatzak».
«Espazio publikoa edukiontziekin okupatzeak ez du zentzurik»
Aurreneko alegazioak edukiontziak hondakin geletan mantentzeko eskaera jasotzen zuen. EH Bilduk azaldu du «hondakin gelak eraikin berrietan egokitzeko derrigortasuna, Etxebitiza Ministerioak onartzen duen Eraikuntzaren Kode Teknikoan jasotzen» dela, eta beraz, gela hauek ez erabiltzea «zentzugabea» dela.
«Legeak baimentzen duen espazio pribatua erabili ordez, espazio publikoa edukiontziekin okupatzeak ez du zentzurik: kale-paisaiari kalte egiten dio, kotxeentzako aparkalekuak murriztu egiten dira...», dio EH Bilduk. Era berean, EAJri kritikatu dio erabaki hau hartu izana FCC enpresak «agindu duelako». «Badirudi hondakinen gaietan botere publikoak agindu beharrean, hondakin bilketarekin aberasten ari den enpresa pribatuak duela aginte-makila».
Mini-garbiguneetan CDak, bonbillak, pilak... utzi ahal izango dira.
Errefusean, pixoihalak
EH Bilduren esanetan, EAJk onartu ez duen beste alegazioa izan da «pixoihalak banatuta jasotzeko, edukiontzi bereziak jartzea», eta ondorioz, dio «EAJk birziklatzearen alde egiten duen apustua itxurakeria besterik ez» dela. 2014ko errefusaren analisiaren arabera, «errefusaren %63,89 pixoihalak» dira, eta beraz, hauetatik zelulosa eta plastiko nahasia berreskuratzeko aparteko bilketa bultzatuta, «herriko bilketa selektiboa %96ra iritsi ahal izango litzateke».
Mini-garbiguneak, laster
Aho batez onartutako alegazioa, eta laster martxan jarriko dena, berriz, mini-garbiguneena da. «Gune horietan, edozein momentutan, CDak, inpresora kartutxoak, bonbillak, mugikorrak, bateriak, pilak... utzi ahal izango lirateke».