Herri Eskola haunditu ahal izateko txostena eskatu dio arkitekto talde bati, Udal Gobernu Taldeak. Modu honetan, «eraikinak dituen beharrak eta aukerak ezagutu» nahi ditu, eta «epe motzean aukera ezberdinak eskola-komunitateari aurkeztuko» dizkiola jakinarazi du.
«Gutxienez, 10 gela berri»
Azterketaren helburua da «eraikin berri bat egitea», baina hori nola egin aztertu nahi du Udal Gobernu Taldeak. «Gaur egungo erakinetik bananduta baina harekin lotuta» egongo dela dio, eta «gutxienez hamar gela berri egitea eta jolas-toki eremu berriak edukitzea aurreikusten» du.
Era berean, «proiektuak eraikin zaharreko zati kaltetuenak eraberritzeko edo gelak haunditzeko aukera ere emango» duela azpimarratu du Udal Gobernu Taldeak.
Hau guztia, «ikasleak ikastolatik atera behar ez izateko» moduan antolatuko duela gaineratu du.
Bi urtetan, eskola egonkortu
Prentsa oharrean azaldutakoaren arabera, «aurreko legealdian Bilduko gobernua ere ez zen gai izan gure herriko ikastolak duen espazio falta behin-betiko konpontzeko», eta EAJ-PNVk dio, «arazoak seriotasunez eta zorroztasunez konpondu nahi» dituela.
Eskolako zuzendaritzak udal gobernuari azaldutakoaren arabera, arazoa da matrikulazioen gorakada dela eta, bi ikasturte barru ez dela lekurik egongo, eta horregatik, «udal gobernu taldeak nahi duena da gure herriko haurrek, gurasoek eta irakasleek eskatzen duten mailari erantzunez, guztientzat Herri Eskola behin betiko egonkortu».
Horregatik, azterketaren emaitzak jaso eta eskola-elkartearekin «aukerarik onena adostu eta berehala», Eusko Jaurlaritzari helaraziko zaio eskaera, azaroan egiten den diru-laguntza eskaeran sartzeko. «Helburua da hurrengo bi urteen buruan Herri Eskola urte askotarako egonkortzea, behingoz».
EH Bilduk eta PSE-EEk adostutakoa, «eskas»
Bestalde, Udal Gobernu Taldeak dio maiatzaren 26an mozioa aurkeztu zuela Bilduk, eskola haunditzeko eskatuz, eta kritikatu du PSE-EErekin bakarrik adostu duela proposamena, eta gainera, «Herri Eskolaren beharrak ikusita, eskas» gelditzen dela.