Herriko komertzioaren aldeko kanpaina abiarazi zuen aurreko astean Berriak elkarteak, eta Udalak bere babesa adierazi du prentsa-ohar bitartez: «garai txarrak dira merkatari txikientzat. Gure jendartean aisialdia bizitzeko eta erosteko ohiturak aldatzen ari dira, eta hori eragin oso kaltegarria izaten ari da denda txikietan».
Horregatik jakinarazi dute: «Udalak herriko merkataritzaren alde lanean jarraituko du, eta oraingoan ere, Berriak elkarteak egunotan martxan duen kanpainarekin bat egiten du».
Hainbat ekimen, Udalak
Eragin hori leuntzen laguntzeko, hainbat ekimen jarri ditu martxan Udalak, betiere, Berriak elkartearekin elkarlanean. Izan ere, diote: «garapen eredu jasangarrian sinisten dugulako funtsezkoa iruditzen zaigu tokiko ekonomia sustatzea, eta horretan, pieza garrantzitsua da herriko merkataritza bizi eta osasuntsu egotea».
Horretarako, «merkataritzarekin lotutako kezkak, arazoak eta proposamenak Merkataritza Mahaian lantzen dituzte Udalak eta Berriakek». Gainera, «Udalak, 2014tik, urtero, 14.000 euroko ekarpena egiten dio Berriaki haren funtzionamenduan eta kanpainetan laguntzeko».
Beste erakundeen diru-laguntzak ere baliatzen dituzte, hala, «Eusko Jaurlaritzak urtero ematen dituen Hirigune (lehen Merkagune) diru-laguntzak ere baliatu ditu Udalak merkataritza suspertzeko», argitu dute.
Beste hainbat neurri ere hartu ditu Udalak, besteak beste: «karpa tolesgarriak herriko elkarte guztien esku daude haien ekitaldiak eguraldiaren menpe egon gabe egin ahal izan dezaten».