Festarako gogoak euriaren ondoeza gainditu eta giro ederrean ibili ziren larunbata guztian zehar Osiñaga eta Etxeberriko auzotarrak. Ez hori bakarrik, herriko beste txokoetatik ere hurbildu ziren atzo ospatu ziren hainbat ekitaldi desberdinetara.
Festaz gozatu nahi duenak gaur ere badu aukera. Etxeberriko haurren danborrada 11:00etan irtengo da eta ordu berean Meza nagusia hildakoen omenez egingo da. Sagardo dastaketa, koadrilen bazkaria, Bingo herrikoia eta errifaren zozketa ere egongo dira.
Osiñagan auzokoak gogoratuko dira beheko zubian 11:30etan. Ondoren gazteen pelota partiduak, Tolosa ahizpen doinuak, Aitor Mendiluze eta Unai Agirre bertsotan, abere desafioa eta Joxe Angel El Navarroren dantzarekin amaituko dira festak datorren urte arte.