Madrilen izan berri dira Harituz elkarteko kideak, Fuenlabradan. Topaketa antolatu zuten maiatzaren 20an, Alquimia Feminista elkarteak antolatuta, Fuenlabradako Berdintasun Sailaren laguntzarekin.
Indarkeria Sexistaren Kontrako Matazak proiektua eraman zuten bertara, eta baita lazo erraldoia erakutsi ere, herriko eraikin publikoetan.
Are gehiago, maiatzaren 15etik hilaren bukaerara arte, zintzilik egon da eraikinen fatxadetan: Fuenlabradako udaletxea, Emakumearen Etxea, 8 de marzo Berdintasun Zentroa eta La Plaza gazte espazioa.
Dagoeneko, 3.400 metroko luzera dauka lazo erraldoiak.
Beste zazpi herritako elkarteak, topaketan
Harituz elkartearekin batera, topaketan parte hartu zuten beste zazpi herritako elkarteek: Fuenlabrada, Coslada eta Valdemoro (Madril), Agullent eta Biar (Valentzia), Huarte (Nafarroa) eta Toledo (Castilla-La Mancha). Harituzekin batera, konpartitu zituzten beraien esperientziak eta hausnarketak, indarkeria matxistaren inguruan. Fuenlabradako berdintasun zinegotziak, Silvia Buabentek, aldarrikatu zuen «gizarte guztiaren laguntza» behar dela «borroka iraunkor honetan».
Hurrengo topaketa, Huarten
Harituzek eta Matazak proiektuak, Huarten izango dute hurrengo topaketa, urrian, «sareak ehuntzen eta gizartea konprometitzen jarraitzeko».