Herriarteko Txapelketako finalaurdenak martxan jarriko dira gaur, 21:00etan, Hernaniko kiroldegian, joaneko partiduekin. Donostia 6-0 garaitu eta gero, Zizurkil izango dute aurkari oraingoan. Hernaniko pilotariak faborito gisa aterako dira Zizurkilen aurka. Kadeteetan Xabier Salaberriak eta Ohian Zugastik, Lasa-Etxeberriaren aurka egingo dute eta partidua berdinduta dago. Zizurkilek aurrelari arriskutsua du, baina Hernanik bere maila emanez gero, kanporaketako lehen puntua lortu beharko luke.
Jubeniletan Garikoitz Arizmendik eta Endika Arizmendik, Alberdi eta Arrateren aurka egingo dute. Jaialdiko partidurik zailena da. Zizurkilek du mailako aurrelaririk onenetakoa, eta laguna ere ona da, baina Arizmendi lehengusuak ondo jokatzen ari dira eta gauza dira puntua eskuratzeko.
Nagusietan Ioritz Arrietak eta Markel Lizeagak, Labaka-Arregiren aurka egingo dute. Hernaniarrak faborito dira. Zizurkilgo aurrelaria oso ona da, baina lagunak ez du bere maila. Kanporaketa aurrera ateratzeko oso garrantzizkoa izango da tanto kopurua.
Euskal Herriko Txapelketa, Trinketean
Asteburu honetan bi bikote hernaniarrek semifinalak jokatuko dituzte Euskal Herriko Trinkete Txapelketan.
Gaur, 16:00etan, Gasteizko Astronomoak trinketean Ioritz Berasarte eta Ander Lazkano jubenilek Txukun Lakuaren bikotearen aurka jokatuko dute. Hernaniarrak dira faborito. Igandean, 11:00etan, Iruran Eneko Garmendia eta Jon Perurenak Gaztelekuren aurka jokatuko dute. Andoaingo bikotea da faborito.