Zein da Hernaniko Gaztelekuaren ibilbidea?
Hernaniko Gaztelekua proiektu pilotu bezala 2000. urtean jarri zen martxan. 2002. urtetik gaur egun arte, Urburu Aisialdia izan da Gaztelekua kudeatzeaz arduratu dena, eta aisialdi hezitzaile bat sustatzea du helburu. Elkar kudeatutako zentro bat da, non, proiektua indartzea eta egonkortzea lortu den. Aisialdi proiektu bat izateaz gain, proiektu hezitzaile bat izatea eta gazteengana iristea da asmoa. Helburu hezitzaileak egokiak izateko, Udala Gaztematika sarean sartzeko lehen urratsak eman ditu, ildo beretik lanean jarraituz.
Eta orduan zein da Gaztelekuan egiten duzuen lana?
Gaztelekua Hernaniko Udalak eta zehazki Gazteria arloak eskaintzen duen doako zerbitzua da. Zerbitzu hau 12-17 urte bitarteko gazteei zuzendua dago. Gaztelekuan gazteen beharrak identifikatu eta entzun, gure esperientzia partekatu eta gazteei protagonismoa ematen diegu. Gaztelekua aisialdi zerbitzu bat da besteak beste. Horretarako Gaztelekua bezala ezagutzen den lokalaz gain, kalea ere, ekintzak burutzeko erabiltzen da. Arreta zuzenean, gazteei gure hezitzaile lanaren ikuspuntua azaltzen saiatzen gara, beti ere konfiantza eta gertutasun puntu bat eskainiz. Izan ere, ez gara gazte hauen ez irakasle eta ez guraso eta guregan konfiantza osoa edukitzeko aukera ematen diegu.
Zergatik animatu zineten “Tratu Onen Mapa” prozesuan parte hartzera?
Arremanitz Kooperatibarekin landu dugun gaia izan da, eta gure egunerokoan, hezitzaileak pertsonalki, lan talde bezala eta hezitzaileak eta gazteon artean zaindu behar den ezinbesteko gaia dela iruditzen zaigulako. Gaur egungo gizartean norberak bere buruan bakarrik pentsatu eta lehiakortasuna bultzatzen dela ematen du baina zaintzen gaia ez dugu ahaztu behar. Denok daukagulako zainduak izateko eta zaintzeko beharra. Interdependienteak garela izaki sozialak garen heinean.
Zuen ustez, eta Tratu Onei dagokionez, zer indartu behar da Hernani mailan?
Zaintza lanei balioa ematea iruditzen zaigu garrantzitsuena. Denak baitauzkagu mota ezberdinetako beharrak, eta gaur egun gazteenak asetzeari berezko garrantzia eman nahi diogu ideia honen transmisioa egiteko. Hauek izango baitira etorkizuneko heldua.
Eta herrian daukaguna baloratze aldera, zeintzuk dira egun gazteen artean dauden praktika onak?
Hernanik herri handi baten ezaugarriak baditu ere herri txiki baten izaera dauka. Bere alderdi on eta txarrekin. Batzuetan denok ezagutzen garela ematen badu ere, askotan koadrilaka ibiltzen gara eta batzuetan adin tarteka bereizten gara. Horregatik txalotzekoa da, azken urtetan Gazte Olinpiadek jokatu duten papera herriko gazteen arteko
harremanak estutzeko.
Zer nolako aisialdi eredua irudikatzen duzue denontzako ona izango den Tratu Onen herri amestu hortan?
Parte hartzailea, parekidea, inklusiboa eta euskalduna. Pertsona guztiak desberdinak
garela ulertzen duena eta aniztasuna balioan jartzen duena. Zaintza lanak erdigunean izango dituena.