Garazi Etxarri, Berdintasun zinegotziak eta Esti Aldeiturriaga, Jarduera Fisikoa eta Kirol zinegotziak atzo aurkeztu zuten Joka dezagun plazan! ekimena. «Helburua da ikusaraztea emakumeek zein traba izaten dituzten kirola egiteko. Orain arte, espazio pribatuan egin du kirola emakumeak, eta orain ari da esparru publikoa hartzen. Pasa den urtean egin zen dokumentalaren jarraipena dela esan liteke» azpimarratu zuen Garazi Etxarrik.
Aldarrikapena, kirola eta festa uztartu eta emakumea protagonista izango duen ekitaldia da. «Helburua berdintasuna lortzea da eta emakumearen presentzia areagotzea kirolean»
Horretarako kirol ekimen desberdinak antolatu dituzte, biharko, Tilosetan, ezagutarazi zuen Esti Aldeiturriagak. «Tilosetan antolatu da eta eguraldi txarra egiten badu kiroldegira pasako litzateke jaialdia». Hernaniko palistek lagunduko dute ekitaldian eta hasteko 17:30etan herriko neskatoek parte hartuko dute barrene herrikoian.
18:00etan pala partidua jokatuko dute Hernaniko palistek: Amaia Alkorta eta Koro Loiarte bikotea, Arantxa Gorostegi eta Aitziber Otegik osatutako bikotearen aurka arituko da.
Bertso-pelota jaialdian, Iratxe Ibarra eta Andoni Egaña
Ondoren, bertso-pilota jaialdia antolatu da. Bertan, bertso saioa eta esku pelota partidua txandakatzen joango dira. Talde urdinean Patri Espinar eta Iñaki Esnal esku pelotariak egongo dira eta beraien botileroa Iratxe Ibarra bertsolaria izango da. Talde gorria Eneritz Arrieta eta Mikel Olazabal bikoteak osatzen du eta beraien botileroa Andoni Egaña izango da. Antolatzaileek herritarrak animatu zituzten parte-hartzera.