Indartsu dator aurten ekaina. Berez ekitaldi ugari dituen hilabetea izan ohi da San Joanen bueltan eta aurten oraindik ere festa gehiago daude. Osiñagako festekin hasten da jai giroa eta aurten Mendekosteak atzeratuago datozenez Florida auzokoekin batera antolatu dira.
Nagusien danborrada hasteko
Floridan ostiralean emango zaie hasiera programa zabal batekin. Etxeberrin sona haundia izan dute beti danborradek. Festak 18:00etan hasiko dira pilotalekuan txupinazoarekin eta nagusien danborrada iluntzeko 23:00etan irtengo da. Larunbatean 10:30etan ekingo diote haur jolasekin eta denetarik egongo da egun guztian zehar. Jolasak, mus txapelketa, bazkari herrikoia, Globota eta disko festa daude besteak beste. Igandean haurren danborrada 11:00etan hasiko da. Meza, bingoa, koadrilen bazkaria, errifaren zozketa, sagardo dastaketa eta azken traka ez dira faltako.
Osiñagan, bi egun festetan
Beti ere Harriatsu erdigune hartuta Osiñagako festak larunbatean hasiko dira eguerdiko txupinazoarekin, bizikleta bira eta hamaiketakoa egin ondoren. Musika, bertsolariak, otorduak, pelota eta herri kirolak dira ekitaldi nagusiak bi egunetan. Laiotz, Tolosa ahizpak, Paolla, Andoni Mendizabal, Joxe Angel ‘El Navarro’, Aitor Mendiluze eta Unai Agirre dira izen propioak.