Ehunkaria izenarekin, aldizkari berria argitaratu du Astigarragako EH Bilduk. Helburua da, «EH Bilduren lana, ekimenak eta proposamenak herritarrengana zuzenean helaraztea», eta horretarako, hiru hilean behin argitaratuko du aldizkaria.
Aurreneko alea, dagoeneko banatu dute etxez etxe; eta norbaitek jaso ez badu, interneten dauka eskuragarri, helbide honetan: issuu.com/ ehbilduastigarra/docs/ehunkaria-01_behinbetikoa. Bestela, fisikoki eskuratu nahi izanez gero, idatzi dezala emaila, helbide elektroniko honetara: astigarraga@ehbildu.eus.
Izenaren arrazoiak, hiru dira bereziki: «ehun egunero argitaratu nahi delako, herritarren arteko sarea ehuntzeko tresna izan behar duelako, eta bat egiten duelako astigartarron oihu ezagunarekin, Ehun ta ehun, berrehun. Aupa Astiarra!», azaldu dute.
Aurreneko alean, laburbildu nahi izan dute azkeneko bi urteotan EH Bilduk kulturaren arloan egin duen lana: kultur etxe berria, udal espazioen berrantolaketa eta Sagardoetxea. Hainbat berri labur ere jaso dituzte, auzoei, mugikortasunari edo aniztasunari buruz.
Batzarra, gaur arratsaldean
Gaur, berriz, batzar baterako deia egin die EH Bilduk, herritarrei. Arratsaldeko 19:00etan izango da, Herri Eskolako areto nagusian; eta bertan eztabaidatuko dute, promotorak egin duen proposamena, kultur etxe berria egiteko.