Urteak daramazki Aimar Arizmendi, euskal jatorria duen amerikarrak, euskal aztarnen inguruko bidaiak egin nahiean, eta orain lortu du! Eta ez nolanahi, Ternuara antolatu du bidaia duela 500 bat urte euskal balezaleek egindako ibilbidea egitera, Euskal bale arrantzaleen aztarnen atzetik izenburupean.
Ekainaren 14tik 22ra arte izango da hori, eta bertan izango dira, besteak beste, Astigarragako Astarbe familiako kideak, Astarbe sagardotegia ustiatzen duen XVgarren belaunaldia: «guretzako, gure familiarentzako oso berezia izango da bidaia, oso hunkigarria, iragana eta etorkizuna batzen dituelako», azaldu zuen Hur Astarbek asteartean egin zuten prentsaurrekoan.
Bertan izan ziren familiaren ordezkariaz gain, Aimar Arizmendi antolatzailea, eta espedizioa burutzen lagundu duten erakundeetako ordezkariak: Xabier Eleizegi, Foru Aldunditik; David Crestelo, Plentziako alkatea; Iban Zabala, Mala Gissonako gerentea; Silvia eta Arantxa Renteria, Plentziako Untzi Museoko ordezkariak; eta Zorione Etxezarraga, Astigarragako alkatea.
Astigarragaren ordezkari gisa hitz egin zuen Etxezarragak, eta adierazi zuen, «Udalak zuzenean lagundu ez badu ere, herritarrentzako eta Udalarentzako ohore bat dela herrian tradizioa duen etxe bateko familia batek horrelako proiektu kultural batean partehartzea».
Herriaren agurra, gaur
Baina herritarrek beraiek ere, izango dute Astarbe familia agurtzeko aukera, bereziki horretarako antolatu duten Ternuara goaz! jaialdian.
Eguerdiko 12:30etan hasita, eta iluntzera arte bertsolariak, musika, dantza eta Egurraren Performancearekin gozatu ahal izango da, baita bertan bazkaldu ere.
Egun osorako joan nahi duenak 40 euro ordaindu beharko ditu, bazkaria barne. Kontzertua eta performancea debalde izango dira, eta sagardoa edan edota pintxoak jateko tiketak bakarrik erosi ahal izango dira, sagardotegian bertan.
‘Ternuara goaz!’ jaialdia
12:30: Ekitaldiaren hasiera Oihana Bartra eta Miren Artetxe bertsolarien eskutik.
13:00: Kalakan taldearen kontzertua. Egurra Performancea Anna Roca Barbarà eta Iñaki Villanuevaren parte-hartzearekin.
14:00: Bazkaria sagardotegian bertsolariek girotuta.
17:00: Bertso musikatuak.
19:00: Odolaren Mintzoa taldearen kontzertua.
*Egunean zehar sagardoa txotxetik eta Mala Gissonaren garagardoa eta pintxoak izango dira.