Laster iritsiko dira San Antonio jaiak, Ereñotzura. Festak iragartzeko kartela aukeratu da, dagoeneko: Amaia Zabalegi Oyarbidek egindakoa; Hernaniko San Joanetako kartela egin duena, baita ere.
Datorren asteko asteburuan hasiko dira festetako programak buzoietan sartzen, eta berehala iritsiko dira festak gero, ohiko mus txapelketa eta mendi lasterketa iragarle dituztela.
Mendi lasterketan izena emateko aukera, irekita
Hain zuzen, ekainaren 2an egingo da aurten, Mus Txapelketa, eta asteburu horretan bertan egingo da, baita ere, festen aurretik inguru guztiak girotuko dituen lasterketa.
Ekainaren 4an, 10:30etan hasiko da Ereñotzuko VII. Mendi Lasterketa, eta izenematea irekita dago, Hernaniko Ibai Mendi kirol dendan edo www.kirolprobak.com webgunean, 8 euroan. Lasterketa egunean bertan ere eman ahal izango da izena 10 euroan, 09:30etatik aurrera, dortsalik geratuz gero.
Ibilbideak guztira 12 kilometro ditu, eta 832 metroko desnibel metatua; punturik altuena, Urdaburu izango da. Hasi eta bukatu, noski, Ereñotzuko plazan egingo da.
Bestalde, 5 eta 11 urte bitarteko haurrentzako lasterketa bat ere egingo da, kilometro bakarrekoa, eta parte-hartzaile guztiei emango zaie opari bana.