2017ko seihilekoan Kultur Etxe berria eraikitzen hasi beharko litzakeela ikusita, Urumea Berriko promotoreak proposamen zehatza egin dio Udalari, EH Bilduk azaldu duenez.
Hori eskuartean izanda, eta «Udalak hartu behar duen pisuzko erabakia dela ohartuta, EH Bilduk gaia eztabaida publikora zabaldu nahi du eta herritarren inpresio eta iritziak jaso, proposamen honen inguruan hartu beharreko posizioa guztion artean osatzeko», diote.
Horretarako, batzar irekia egingo dute asteazkenean, arratsaldeko 19:00etan hasita, Herri Eskolako areto nagusian.
Arratsaldeko 19:00etan izango da batzarra, Herri Eskolako areto nagusian.
Hainbat baldintza
Proposamen horretan, oposizioko taldeak adierazi duenez, «Udalak egin nahi duen Kultur Etxea egiteko hainbat baldintza ezarri ditu».
Horien artean, bi nabarmendu ditu EH Bilduk: bat, «aurreikusitako hotela eta bulegoak beharrean, 98 etxebizitza egin ahal izatea»; eta bestea, «Udalak eskuratu behar zuen 750 m2-ko lokal batera jaso beharrean, bi leku desberdinetan 350 m2, eta 400 m2-ko bi lokal ematea».
«Herriaren aurreikuspenetan eragin zuzena izango dute»
Horren aurrean, baldintza hauek «herrian aurreikuspenetan eragin zuzena» izango dutela diote: «batetik, aurreikusita baina 200 pertsona gehiago izango lituzke herriak eta honek udal zerbitzuetan izan dezakeen eragin zuzena nabaria da; bestetik, 750m2 lokala banatzea, plenoak haurreskola berriarentzako erabakitako espazioa mugatuko luke eta ondorioz, haurreskola bertan kokatzea bideraezina litzateke», hausnartzen dute EH Bilduko kideek.