Atzo goizean PISA 2018 Pilotaje proba, 4 bat orduko azterketa egitera deituta zeuden DBH 4garren mailako 140 bat ikasle. Ikasleak ebaluatzeko nazioarteko programaren informea da PISA txostena, OCDE Ekonomia Lankidetza eta Garapenerako Erakundeak hiru urtean behin egiten duena, eta pilotaje honen helburua da hurrengo ikasturtean egingo den PISArako tresnak balioestea.
Azkenean ikasle horietatik 66 inguruk egin beharko zuten proba, baina 91 gurasoren kontrako sinadurak bildu zirenez, bertan behera geratu zen.
Gurasoen ekimena
Probari kontra egiteko ekimena guraso talde batek sustatu du, eta hauen esanetan, «zuzendaritzak eta irakasleek ez dute babesik adierazi».
Institutuko zuzendaritzatik azaldu dute «ekimena gurasoena» izan dela. «Bagenekien egingo zela, eta prest ginen. Azkenean, ezezkoak medio, bilduko zen lagina esanguratsua izango ez zenez, bertan behera utzi dute proba. Aurrekoa, 2015ean egin zen, eta Hernani BHIk parte hartu zuen. Aurten, ulertzen dugu, informazioa oso argi ematen ez dutenez, gurasoengan susmoak eragitea, guretzat ere ez baita erraza izan. Baina ikastetxe bezala ez dugu planto egin».