Buruntzaldea-Beterriko gazteei lan merkatuan sartzen laguntzeko programa da Txertatu Merkatuan, GARAPENek, Garapen Agentzien Euskal Elkarteak bultzatzen duena.
Hiru proiektu jarriko dira martxan, langabezian dauden gazteei zuzenduta. Horietako bat, lan bertikalena, bukatzear dago, baina bigarrenerako izenematea ireki da.
Hurrengo prestakuntza, margoketa industriala eta bizikleten konponketarako
Txertatu Merkatuan programaren bueltan martxan jarritako aurreneko proiektua lan bertikalena izan zen; bertan parte hartu duten gazteek jaso dituzte klase teorikoak, eta dagoeneko praktikak egiten ari dira. Besteak beste, Hernaniko Udaleko fatxadako egoeraren balorazioa egiten ibili dira.
Oraingo honetan, bigarren prestakuntza proiektua jarriko da martxan, ekainaren 12an hasi eta azaroaren 7ra arte; Margoketa Industriala eta Bizikleten Konponketa.
Prestakuntza saioak astelehenetik ostiralera emango dira, lau ordutan, eta abuztua kenduta. Gizarte eta lan orientazio eta integraziorako teknikak erakutsiko dira batetik, eta bestetik, bizikleten konponketa eta margoketa industrialeko prestakuntza jasoko da.
Izenematea, irekita
Izenematea irekita dago Andoaingo Urgain Etxean (La Salle etorbidea, 6), 09:00etatik 15:00etara, 943 30 42 21ean edo txertatumerkatuan@andoain.eus.
Gazteei, 8 eta 22 urte bitartekoei zuzendutakoa da.