Ergobiako auzoan, Urumea ibaiaren ertzean zegoen errumaniar kanpamendua apirilaren bukaeran hustu zen, azkeneko 14 familiak joan zirenean. Eta orain, lur hori nola aprobetxatu aztertzen ari da Astigarragako Udal gobernua: «aisialdirako eta kirol erabilera eman nahi dio orain arte kanpamentu errumaniarra izan den lurzoruari», azaldu dute prentsa-ohar bitartez.
Skate parke bat egitea, aukeran
Bide horretan, Skate parke bat egitea aztertzen ari da EAJren gobernua: «skate parke publiko bat egitea gure herriko eta inguruko gazteen aisialdirako eskaintza hobetzeko aukera paregabea izango litzateke», diote oharrean bertan.
Eta horretarako, hasi dira tramiteak egiten: «geroztik [kanpamendua behin betiko hustu zenetik], udal gobernua harremanetan dabil Gipuzkoako Foru Aldundiarekin Astigarragako Udalak lurzoru horren erabilpena bereganatu ahal izateko», adierazi dute.
«Udal gobernua harremanetan dabil Foru Aldundiarekin Udalak lurzoru horren erabilpena bereganatu ahal izateko»
Bideragarritasuna aztertzea, hurrengo pausua
Lan horiekin hasita, proiektua bera bideragarria den ala ez aztertu beharko du Astigarragako Udalak: «Udalak aztertuko du Skate parke publiko bat eraikitzearen bideragarritasuna eta era berean, kontuan izango ditu eremuari erabilpen egokia emateko dauden aukera ezberdinak, betiere astigartarren aisialdirako eskaintza hobetzeko helburuarekin», jakinarazi du Udal gobernuak berak.