Kepa Alvarez hernaniarrak, SOS Errefuxiatuak Hernani eta Greziako Pampiraiki elkartearen izenean, eskerrak eman nahi izan dizkie furgoneta erosten lagundu zutenei.
Grezian dauden errefuxiatuen artean elikagaiak eta beharrezko materiala banatzeko furgoneta erosi zuen, eta urtarrilean iritsi zen Atenasera.
«Gure ekintzen inguruan gardentasunez jokatzeko konpromisoa daukagu, eta bilketaren inguruko balantze ekonomikoaren berri eman nahi dugu», azaldu du.
Gastuen zatirik haundiena, laguntza bidez ordaindua
Emandako datuen arabera, «bildutako gehiena lortu da Hernaniko bizilagunen laguntza pribatuen bidez, Euskadi eta estatu espainiarreko hainbat txokotatik iritsitako laguntzen bidez, bertako enpresen ekarpenen bidez, elkarte solidarioetatik eta Mexiko edota Indonesiako laguntzaileen bidez».
Guztira, 15.138,6 euroko gastua eragin du proiektuak: «11.680 euro furgoneta erosteagatik, eta 3.458,60 euro furgoneta jaso eta ekartzeko tramite eta bidaiengatik». Laguntzen bidez jasotako kopurua, berriz, 14.507,54 eurokoa da: «13.211,54 euro bamkoan, eta 1.296 euro Nacido en Siria dokumentalaren proiekzioetatik eta errifetatik». Balantzea orekatzeko falta den 631,06 euroko aldea, SOS Errefuxiatuak Hernaniko boluntarioek jarri dute.
«Gertuko administrazio publikoek ezetza eman arren, furgoneta iritsi da Grezian dauden errefuxiatuengana»
«Udalaren ezetza publiko egin nahi dugu»
Bestalde, «ekonomikoki laguntza emateko Udalaren ezetza publiko egin nahia» azaldu du elkarteak. «Ahozko erantzuna azkarra izan zen, eta karta bidezkoa 3 hilabetera eta hainbat eskaeraren ondoren iritsi zen». Elkarteak dio «Udalak emandako laguntza bakarra, 5 urtetan, 400 eurokoa, Nacido en Siria proiektatzeko eskubideak ordaintzeko» izan dela.
Hala ere, azpimarratu du «gertuko administrazio publikoek ezetzaeman arren, furgoneta Grezian dauden errefuxiatuengana iritsi».