«Ratioak jaitsi», «Plantillak handitu» edota «Lan Baldintzak hobetu» zioten leloak ikusi zitezkeen atzo Donostiako manifestazioan, ELA, LAB eta Steilas sindikatuek deituta, hezkuntza komunitateak egindakoan.
Aurretik, Hernanin bertan institutuan eta Plazan egin ziren kontzentrazioak; «Irakaskuntza greban. Aski da. Murrizketarik ez» lelopean.
Komunitate osoa, bat eginda
Sindikatuen esanetan, «oso jarraipen zabala» izan du greba deialdiak, eta komunitate osoak egin du bat, lau arlotan: irakasleak, heziketa berezia, sukaldariak eta garbitzaileak eta Haurreskolak. Hau, hirugarrena izan da; lehengo asteartean eta martxoaren 22an egin ziren aurrekoak.
Sindikatuen eta Eusko Jaurlaritzaren datuak ez datoz bat, hala ere. Hernaniri dagokionez, ikastetxeek emandako datuen arabera, erabateko greba egin zuten atzo berriro, Langilek, Txirritak eta Haurreskolak. Urumean %70ak egin zuen greba atzo, eta aurrekoan, %75 inguruk. Elizatxon, atzo %52ak, eta aurrekoan, %85ek. Eta institutuan, atzo %66ak eta aurrekoan, %46ak. Lanbide Heziketan ere egin dute bat greba deialdiekin, baina oraindik ez dute datu zehatzik.