Herriko aurreneko txakur parkeak irekitzeko lanean dihardu Astigarragako Udalak, eta hala jakinarazi du prentsa-ohar bidez.
Bertan azaldu dute beren nahia dela herritarrek «lehenbailehen» erabili ahal izatea gune horiek. Eta dagoeneko jarri dute aurreneko irekieretarako data: «lehenengo bi espazioak uztailean irekiko dira, Ergobian eta Donostia Ibilbidean kokatuta daudenak. Bigarren hau, herrian sartzeko errotondako bidegorriaren parean dago».
Hirugarren bat irekitzea ere aurreikusten dute, baina hori Arrobitxuloko ezponda egonkortzean egingo dute.
Egokitzapen lanak, bi eremuetan
Azaldu dutenez, dagoeneko egin dira eremu horiek egokitzeko lan batzuk: «Udalak adar baxuen kimaketa egin du, txakurren segurtasuna bermatzeko, eta itxurarekin ere aurrera egin du azken asteetan. Garbiketa berezi bat ere egin da Ergobiako txakur parkean».
Hurrengo asteetako lanen berri eman dute, gainera: «txakur-toki bakoitzeko eremu bat ondarrez betetzea aurreikusten da. Bertan, txakurrek beren beharrak egin ahal izango dituzte. Hondarra maiz desinfektatuko da».
Eta baita ireki aurretik egin beharrekoak ere: «Udalak kartelak jarriko ditu txakur guneen sarreretan, bete behar diren arauak erabiltzaileen artean zabaltzeko. Gorotzak jasotzeko, poltsak emango dituzten makinak jarriko dira. Eta aurrera begira, Astigarragako udal gobernuak txakur-guneetan altzariak eta jolasak jartzea aztertuko du», azaldu dute oharrean bertan.