Anuska auzoko hobekuntzetan lanean ari direla azaldu du Astigarragako Udal gobernuak prentsa-ohar bitartez. Helburua da, hain zuzen, «Anuskaren irisgarritasuna eta oinezkoen zirkulazioa hobetzea».
Bide horretan, «epe motzean bukatuko dute aurreko legegintzalditik martxan dagoen eskailera-atala, hodi erdiaren eta lorategiaren ondoan dagoena».
Laster hasiko dira Santiomenditik erortzen diren uren bilketarako lanak.
Beste lan batzuk, laster
Horrez gain, azaldu dute beste hainbat lan egingo dituztela: «lurrari tratamendu bat emango zaio, inguruko baldosen egoera hobetzeko».
Eta laster, baita ere, hasiko dira Santiomendiko magaletik Anuskara jaisten diren uren bilketarako lanak: «hiru aurrekontu eskatu dira dagoeneko, eta egokiena zein den aztertzen denean, aurrera jarraituko dugu proiektuarekin».
Mugikortasun plana, azkeneko pausua
Eskailera-atala osatzearekin hasiko den prozesuari, Mugikortasun Plan osoarekin emango zaio bukaera: «Udala burutzen ari den Irisgarritasun Planaren barruan sartuko da Anuskaren Mugikortasun Plana, eta bertan zehaztuko dira bizilagunentzat auzoaren irisgarritasuna hobetzeko egin beharreko obrak», bukatu dute.