Beste greba deialdi bat egin dute biharko, hezkuntza publikoan, LAB, ELA eta Steilas sindikatuek; eta espero da, jarraipen zabala izatea, herriko eskola gehienetan: Elizatxon, Langilen, Txirritan, Urumean, Institutuan, Lanbide Heziketan eta Haurreskolan.
Eta greba bakarrik ez, mobilizazioak ere deitu dituzte herrian, BHIko irakasle talde batek eta Hernaniko Hezkuntza Plataformak. Kontzentrazioa egingo dute 07:50etatik 08:30etara, Institutuko sarreran aurrena, eta semaforoan gero; 09:00etan, berriz, Plazan egingo dute kontzentrazioa; eta ondoren, 09:30etan, Donostiara bidean abiatuko dira, Bulebarreko manifestazioan parte hartzeko, 12:00etan.
Azaldu dute, «eskola komunitate osoaren elkarlana ezinbestekoa» dela, irakaskuntza publikoa modu duinean mantentzeko. Eta horregatik, grebarekin bat egin eta mobilizazioetan parte hartzera gonbidatu dituzte denak.
«Ez dugu LOMCE ez Heziberririk behar»
Hezkuntza Plataformak, bestalde, babesa erakutsi nahi izan die Langileko 6garren mailako ikasleen gurasoei, Heziberriko probei planto egiteagatik: «Langilek badauka ebaluazio metodologia bat, bertakoa, jarraia, dinamikoa eta integrala, ikaslearen ikasketa prozesua laguntzeko eta hobetzeko asmo garbiarekin. Inposatu nahi dizkiguten proba hauek, berriz, oso helburu desberdinak dituzte, LOMCE legea ezartzea. Horregatik, bat egiten dugu gurasoen erabakiarekin, ebaluazio probak ez direlako onargarriak, ez dugulako LOMCE ez Heziberririk behar. Urteak daramazkigu gure hezkuntza propioa eraikitzen, eta horretan lanean jarraituko dugu», adierazi du Hezkuntza Plataformak.