Denboraldia bukatzeko bi partidu besterik ez ditu falta Hernanik, eta Hirugarren Mailara igotzeko ametsa, gertu baina zail dauka, aldi berean, Alain Gerekaetxeberria eta Agustin Boulandier entrenatzaileen eta Unai Legarreta prestatzaile fisikoaren esanetan.
Zer espero duzue azken bi partiduetan? Kalkulu askotxo egin al dituzue?
Azken bi partidu hauetan, partidu gogorrak espero ditugu. Gaur Martutene dator Zubipera, eta nahiz eta dagoeneko jaitsita egon, ez digu ezer oparituko. Ostadarreko eredua daukagu. Azkeneko partiduan Hondarribiara joango gara, eta oraintxe bertan mailako talde onenetakoen artean dago.
Kalkuluak errazak dira; gelditzen diren 2 partiduak irabazi eta Anaitasunak huts egitea besterik ez zaigu geratzen.
Gaurkoa behintzat, etxean, eta jaitsiera postuan dagoen Martuteneren kontra. Horrek, eta zaleen babesak, lagunduko du?
Igo nahi badugu, gelditzen diren 2 partiduak irabazi beharko ditugu, eta oso garrantzitsua izango da zaleen babesa, jarraitzaileen bultzada sentitzea.
Orain arte, sei partidu galdu, beste sei berdindu eta hogei irabazi dituzue. Ez da balantze txarra…
Orokorrean oso gustora gaude egindako denboraldiarekin. Etxean ez dugu partidurik galdu, eta etxetik kanpo lehen garaipena eskuratzea nahi baino gehiago kosta bazitzaigun ere, partidu zailak atera ditugu aurrera. Denboraldi hasieratik argi genuen hor goian ibili nahi bagenuen etxean indartsuak izan behar genuela.
Hernanik azken bi partiduak ere irabazteko aukerarik ez du falta, baina Anaitasunak ere ez…
Sailkapenari begiratuz gero, badirudi bai Anaitasunak eta bai guk partidu errazak ditugula, baina kategoria honetan sailkapeneko goi postuetan eta behean dauden taldeen artean maila ezberdintasun txikia dago. Horrez gain, denboraldi amaiera honetan beheko taldeak kategorian mantentzeko borrokatzen ari dira, eta ez da erraza izaten hauen aurka jokatzea. Lehen esan bezala, Martutene matematikoki mailaz jaitsi bada ere, denboraldia ondo amaitu nahiko du; ez da arratsalde pasa etorriko. Azken partidua, berriz, Hondarribian izango dugu, maila mantentzeko borrokan dabilen talde baten aurka. Anaitasunak ere, Beti Gazte eta Elgoibar izango ditu aurkari; hauek ere, mailaz ez jaisteko borrokan ari dira.
Denboraldi hasierako helburua zen Hirugarren
mailara igotzea? Zertan jarri dituzue indarrak?
Talde gaztea daukagu, eta aurten aldaketa dezente izan ditugu, gainera. Horrexegatik, denboraldi hasieran ez genuen helburu zehatzik markatu, baina goian ibiltzeko asmotan abiatu genuen denboraldia.
Harrobiaren eta Hernani eta inguruko futbolarien aldeko apustua egitea al da giltza?
Bai zuzendaritzak eta bai entrenatzaileok, garbi geneukan Hernani bezalako talde baten oinarria etxeko jokalariekin osatu behar zela. Denboraldi honetan bigarren taldetik eta jubenilen taldetik 5 jokalari igo dira lehen taldera, eta oso maila ona eman dute denek. Beheko taldeak maila onean ari dira lehiatzen, eta horrek etorkizunean jokalari onak izango ditugula ziurtatzen digu. Aurten, esate baterako, ez dugu fitxaketarik egin, taldea 23 jokalarik osatzen dugu eta horietatik 15 hernaniarrak dira. Gainontzeko jokalari gehienak harrobitik datozenak dira.
«Argi izan dugu goian ibiltzeko etxean indartsuak izan behar genuela»
Zein da taldearen egoera? Zein ditu indar-guneak, eta zein, ahulguneak?
Taldearen egoera ona da. Indar-gunea, aldagela da; helburua garbi daukagu, eta jokalari guztiak gehitzen ari dira: gutxi jolastu dutenak, gazteak, beteranoak… Denak ilusioarekin eta jolasteko gogotsu gaude. Ez genuke harrokerian erori nahi, gauza asko hobetu ditzakegulako, baina taldeak oso ahulgune gutxi ditu momentu honetan.
1956, 1984 eta 2011n igo zen Hernani Hirugarren mailara; 2017an ere bai? Zer esanahi izango luke igoerak, klubarentzat?
Oso polita izango litzateke berriro mailaz igotzea. Hirugarren mailan kategoria haundiko taldeak daude, eta igoz gero, gauzak oso ondo egin beharko ditugu maila mantendu nahi badugu. 2011 urtean igo ondoren, urtebete egin eta berriro Ohorezko Mailara jaitsi ginen; ez genuke nahi berriro gauza bera gertatzea. Egoera hori bizi izan zuten hainbat jokalarik jarraitzen dute taldean, eta esperientzia hori lagungarria izango da Hirugarren Mailan lehiatzeko.
Liga Nazionaleko jubenilek ere lortu dute igotzea. Urte borobila, Hernanirentzat?
Jubenilek izugarrizko denboraldia egin dute, eta meritu haundia dauka Ohorezko Mailara igotzeak. Horrez gain, nesken Euskal Ligako taldeak, eta jubenilen Ohorezko Mailan eta Gorengoen Mailan dauden bigarren taldeek ere kategorian mantentzea lortu dute: Beraz, esan daiteke urte ona izan dela klubarentzat. Ea gure igoerarekin denboraldia borobiltzea lortzen dugun!
Azkarregi amesten hastea ez da ona izaten baina… Igotzea lortuz gero, zer?
Oraingoz ez dugu aukera honen inguruan hitz egin, esaten duzun moduan oraingoz amets bat baita. Baina Hirugarren Mailara igotzekotak, helburua izango litzake astero ondo lehiatzea, eta maila mantentzea, noski!