Bihar hasiko du Herriarteko Txapelketa, Hernanik, urteko torneo garrantzitsuenetako bat: «aurten helburua da, kanporaketak jokatzen joan, eta konprobatzea zein den gure maila, ikusteko aukera daukagun bi faborito nagusiei irabazteko, Azpeitia eta Oiartzuni», azaldu dute taldeko arduradunek.
Donostiaren kontrakoa izango da, gainditu beharko duten aurreneko kanporaketa. Bihar 17:00etan jokatuko dute joanekoa, Atano III frontoian.
Hernaniarrak dira faborito, baina konplikatu egin zaizkie gauzak, hainbat pelotari baitaude min hartuta, bereziki kadete eta senior mailetan.
16 pelotari, Josu Oiaga entrenatzailearen esanetara
Guztira, 16 izango dira, Josu Oiaga entrenatzaileak dauzkan pelotariak: kadeteetan Xabier Salaberria, Oihan Zugasti, Axel Larrañaga, Jagoba Garmendia eta Unax Uitzi; jubeniletan Garikoitz Arizmendi, Alain Agirre, Ander Lazkano, Ekaitz Insausti eta Endika Arizmendi; eta senior mailan, Ioritz Arrieta, Paul Ojuel, Iñigo Urkizu, Markel Lizeaga, Eneko Aizpitarte eta Aitor Gorrotxategi.
Taldetik, zaleei eskatu diete frontoira gerturatzeko: «haien animoek beti lagundu digute emaitza hobeak lortzen».
Hiru partidu gaur, Hernanin
Gaur, berriz, hiru bikote alebin ariko dira Hernanin, 20:00etan hasita: Arabaolaza eta Garcia de Bikuña aurrena, Eguren eta Alegria gero, eta Garmendia II eta Balenziaga azkenik.