Maiatzaren 17a da gaur, eta Hernanin, ospatuko dute Lesbofobia, Homofobia, Transfobia eta heteroarauaren baitan kokatzen ez diren identitate guztiekiko fobiaren aurkako eguna.
LGTBQI asteko egun nagusia izango da, beraz; eta hori horrela, mani-festa-akzioa egiteko zita jarri dute, arratsaldeko 20:00etan, Plaza Berrin.
Hamaika identitate, borroka bat! lelopean, beste hainbat ekintza antolatu dituzte, aste osoan zehar. Atzo eta herenegun, tailer bana egin dute Kontrakantxa gaztetxean, eta bihar eta etzi, zineforuma eta sormen tailerra izango dira.
Baina ekimen gehien, larunbaterako prestatu dituzte. Drag Queen/King tailerrarekin, drag poteo musikatuarekin, eta FesTrans festarekin borobilduko dute astea.
GAUR - LGTBQI fobiaren kontrako eguna
Mani-festa-akzioa. Hamaika identitate, borroka bat! Lesbofobia, Homofobia, Transfobia eta heteroarauaren baitan kokatzen ez diren identitate guztiekiko fobiaren aurkako eguna. Plaza Berritik abiatuta, 20:00etan.
BIHAR, osteguna
Zineforuma: hainbat labur eta haien inguruko hausnarketa. Kontrakantxa Gaztetxean, 18:00etatik 20:00etara.
ETZI, ostirala
Sormen tailerra: Borroka eta adierazpen artistikoak. ‘Gune askea’ murala, txapak eta kamixetak egiteko tailerra (nork bere kamixeta eraman dezala). Kontrakantxa Gaztetxean, 18:00etatik 20:00etara.
MAIATZAK 20, larunbata
Drag Queen/King tailerrak: estereotipoen inguruan hausnartzeko eta bakoitzaren bizipenetatik generoarekin jolasteko tailerra. Kontrakantxan, 18:00-20:00.
Drag poteo musikatua, 20:00-22:00.
FesTRANS: Gune aske transfeminista. Kontrakantxa Gaztetxean 00:00-06:00.
Maiatzak 17ko Manifestua
Udalak aho batez onartu du, M17 Koordinazio Taldearen manifestua
Homofobiaren eta Transfobiaren aurkako nazioarteko eguna dela eta, manifestua aurkeztu zuen Hernaniko M17 Koordinazio Lantaldeak, Hernaniko Udalean. Astelehenean bildu zen bozermaile batzordea, eta aho batez onartu zuten manifestua.
Testuak dio, «itxuraz homosexualitatea eta transexualitatea jendartean onartzen diren identitateak» direla, baina homosexuala edo transexuala izatea «errealitate gogorra» dela oraindik ere, herritar askorentzat: «garrantzitsua da konturatzea, homofobiak eta transfobiak gu guztiongan eragiten duela. Eta ezinbestekoa da, ezbaian jartzea aurreiritzi eta estereotipo heteroarautzaileak, eta aldarrikatzea guztiak ezberdinak garela, guztiak bakarrak garela, eta garen moduan maitatuak izatea merezi dugula», aldarrikatu dute.
EH Bilduren adierazpena
«Oraindik ere asko dago aldatzeko, instituzioetan zein gizartean»
Gaurko egunaren harira, bere adierazpena egin du EH Bilduk, eta deia luzatu die herritar guztiei, 20:00etan Plaza Berritik abiatuko den mobilizazioan parte hartzeko.
«Egun hau lorpen baten isla izan daitekeen arren, oraindik ere asko dago eraldatzeko, instituzioetan zein gizartean. Izan ere, munduko herri askok urratzen dituzte oraindik, LGTBQI kolektiboaren eskubideak», salatu du.
Eta gaineratu du: «gurera etorriz, Euskal Herrian ere egunerokoan ditugu erasoak». Eta horien artean, aipatu ditu Iruñan, Irunen, Gasteizen eta Bilbon gertatutako eraso homofoboak, eta baita Hazte Oir elkartearen «autobus transfoboa» ere.
Horregatik, EH Bilduk aldarrikatu du, Euskal Herriak ezin duela «beste alde batera begiratu», eta ezin duela «eraso hauen konplize izan».